Күндү биир дойдулаахтарбыт!
Аныгы технология билигин олохпут бары араҥатыгар, Аан дойду талбыт муннугар барытыгар балысханнык киирэ турар. Арай табаһыт үлэтэ, олорор усулуобуйата биһиги дойдуга уларыйбакка кэллэ диэтэххэ улахан омнуота суох буолуо. Дьон олорор сириттэн тэйиччи, хас да ый чугас дьонун көрбөккө, бытарҕан тымныыга-буурҕаҕа тоҥон-хатан, кылгас куннээх кыһын хараҥаттан хараҥаҕа, сиртэн сиргэ көһө сылдьан, биир өрөбүлэ суох таба манабыла диэн күн аайы тустуу. Бу ураты түбүктээх, киһи сыратын-сылбатын барытын ылар үлэҕэ арай сиригэр-уотугар, төрүт дьарыгар ураты бэриниилээх эрэ киһи тахсар.
Онон табаһыттары өйүүр туһуттан республика олохтоохторугар үтүө дьыала чэрчитинэн ыҥырыы таһаарабыт: бары бииргэ ичигэс таҥаһы – табаһыттарбытыгар!
Бу саҥа дьыллааҕы уһун өрөбүллэргэ ичигэс таҥас тигэн, баайан, ыстаадаҕа сылдьар ыччаппытыгар, соҕотох дьоҥҥо, саастаах настаабынньыктарга, элбэх оҕолоох ыалларга тиксэриэххэйиҥ диэн ыҥырабыт. Аахсыйаҕа оскуолалар, ыччат түмсүүлэрэ, дьахталлар сэбиэттэрэ, онтон да атын тэрилтэлэр, урбаанньыттар, биирдиилээн иистэнньэҥнэр, ийэлэр, эбэлэр, бары үтүө санаалаах дьон көхтөөхтүк кыттыахтара диэн эрэнэбит. Бэйэ дьоно сылаас илиилэринэн тикпит таҥастара маҕаһыыҥҥа атыыланар синтиэтикэ, синтепон, химиичэскэй булкаастаах таҥастааҕар ордуга чахчы.
Натуральнай матырыйаалтан үтүлүк, тобук, түөс, сис хаххата (сабыыта), сэлиэччик, бэргэһэ, саал-моойторук, уттас, кээнчэ, сутуруо, этэрбэс, таһынан кэтэр хаттык уо.д.а. таҥаһы тутабыт.
2021 с. тохсунньу 15 күнүттэн саҕалаан таҥаһы туттарар сирдэр: Дьокуускай к. Ленин проспега, 4/2,5 этээс (Ситникова Наталья Васильевна - 89142619589);
– Кустуур сэл., Слепцова И.Н. уул., 16, оскуола;
– Харыйалаах бөһ., Октябрьскай уул., 14, оскуола;
– Улахан-Күөл сэл. (Табалаах), М.В. Потапова уул, 13, оскуола.
-
0
-
0
-
0
-
0
-
0
-
0
