Элбэх үлэ үмүрүтүлүннэ
Михаил Гуляев, Ил Түмэн ыччат дьыалатыгар, физическэй култуураҕа уонна успуорка сис кэмитиэтин бэрэссэдээтэлэ:
- 2020 сыл саҥатыгар коронавирус дьаҥа соһуччу туран, пандемияны биллэрэннэр, киһи аймах өмүттэн хаалбыта. Пандемия биир үчүгэйи киллэрдэ. Ол курдук, интэриниэт ситимэ күүһүрдэ, нэһилиэнньэ бары араҥата дистанционнай үлэни баһылаата. Үлэм туһунан этэр буоллахха, дьокутааттар онлайн киэбинэн бары хайысханан үлэбитин ыыта олордубут. Арай уокуруктарбытыгар сылдьан, биһигини итэҕэйэн быыбардаабыт дьоммутун кытары быйыл сэдэхтик көрүстүбүт. Ыарыы киллэрбит балаһыанньатынан элбэх киһи биир сиргэ мустубат буолла. Үлэ-хамнас төһө барда диир буоллахха, Мэҥэ Хаҥалас улууһун Өлөчөй нэһилиэгэр “Биир ньыгыл Арассыыйа” баартыйатын бырагырааматынан оскуолаҕа спортивнай саала үлэҕэ киирдэ. Таатта улууһун Кыйы сэлиэнньэтигэр оскуола тутулла турар. Бу соторутааҕыта Аллараа Бэстээххэ аныгылыы тупсаҕай оҥоһуулаах бассейннаах спортивнай комплекс үлэҕэ киирдэ. Бу сүдү эбийиэк “Спорт – олох нуормата” федеральнай бырагырааманан үбүлэнэн тутулунна. Эбийиэк барыйыагын 2016 сыллаахха оҥорон саҕалаабыттара. Оччолорго мин СӨ Бырабыыталыстыбатын Бэрэссэдээтэлин солбуйааччынан олорон, РФ Успуордун министиэристибэтигэр спортивнай комплекс тутуутун 2018 сыллаах былааҥҥа киллэртэрбитим. Элбэх харгыстары ааһан, үбэ көрүллэн уонна хамсык ыарыытыттан тохтоон хаалбакка, бу күннэргэ үлэҕэ киирдэ.
Сокуон туһунан этэр буоллахха, «Патриотизм туһунан сокуон” барыла оҥоһуллан сытар, кэлэр сыл саҥатыгар көрүллүөхтээх. Бу соторутааҕыта ыччат туһунан РФ сокуона ылылынна, онно ыччат сааһа 35 сааһыгар диэри уһатыллан биэрдэ. Онон сиэттэрэн эдэр ыччат туһунан өрөспүүбүлүкэ сокуона толору уларыйыахтаах, итэҕэстэри-быһаҕастары көннөрөн, эһиил ылыныахпыт. Маны таһынан “О добровольчестве” диэн сокуон барыла бэлэмнэнэр. Саха сирин олохтоохторун, кэлбит Саҥа дьылынан эҕэрдэлиибин! Дьоллоох-соргулаах, чэгиэн буолуҥ!
Саҥа сылы эрэллээхтик көрсөбүт
Сергей Евсеев, Ньурба улууһун дьокутааттарын сэбиэтин бэрэссэдээтэлэ:
- Ньурба улууһугар, ханна да буоларын курдук, үлэ-хамнас Кыайыы 75 сылыгар ананна. Нэһилиэнньэ уонна тэрилтэлэр көхтөөхтүк кытыннылар. Кыайыы пуондатыгар 2,5 мөл. солк. киирбитинэн араас тэрээһиннэри ыыттыбыт. Кыайыы болуоссатыгар тыыл бэтэрээннэригэр аналлаах Килбиэн пантеонун уонна Ньурба олохтооҕо, сэрии бэтэрээнэ, Берлиҥҥэ диэри тиийэ сэриилэспит, аатын истиэнэҕэ суруйан хаалларбыт Феодосий Семенович Донскойга анаммыт Өйдөбүнньүк бэлиэни туруордубут.
Ааспыт сылга ыарыы мэһэйдээн, уопсай үлэҕэ бытаарыы тахсыбыта. Ол да буоллар, сүрүн тутууларбыт ыытылыннылар. Антоновкаҕа уонна Ньурба куоракка баар Николай Николаевич Чусовской уонна Сэбиэскэй сойуус дьоруойа Николай Петрович Кудряшов аатынан уулуссалар Кыайыы 75 сылын көрсө аспаалланнылар. Федеральнай бырагыраамаларга кыттан, элбэх тутуулар дьэндэйдилэр. Ааспыт сыл бүтүүтэ 280 миэстэлээх оҕо саадын тутуу түмүктэннэ. Биир бэлиэ түгэнинэн Ньурба паарката үлэҕэ киирдэ. Итини таһынан, Ксенофонт Дмитриевич Уткин аатынан норуоттар доҕордоһууларын түмэлэ саҥардылынна.
Саҥа сылга Ньурба тыйаатырын тутуута түмүктэниэхтээх, Бордоҥ нэһилиэгэр муусука оскуолалаах оҕо эстетическэй киинэ тутуллан үлэлиэҕэ. Хатыы – Киров сэлиэнньэлэрин хайысхатынан биэс нэһилиэги хабар суол оҥоһуллуоҕа. Чаппандаҕа, Чуукаарга оскуолалары тутуу салгыы ыытыллыаҕа. Күндээдэҕэ оскуола тутуута саҕаланна. Маарга уонна Хаҥаласка оҕо саада үлэҕэ киириэхтэрэ. Былаан элбэх, ону олоххо киллэрэргэ үбү-харчыны аттарыахпыт. Саҥа сылы эрэллээхтик көрүстүбүт. Саха сирин ытык-мааны олохтоохторун Саҥа дьылынан эҕэрдэлиибин, бары этэҥҥэ сылдьыаҕыҥ!
Былааннаммыт үлэлэрбитин түмүктүөхпүт
Ульяна Попова, Сунтаар улууһун дьокутааттарын сэбиэтин бэрэссэдээтэлэ:
- Былааннаммыт сыалбыт-сорукпут барыта кэмигэр олоххо киирдэ. Байыаннай килбиэн болуоссатын туттубут, Сергей Зверев -- Кыыл Уола аатынан Норуот айымньытын киинэ аһылынна. 2020 сыл бүтүүтэ 240 миэстэлээх оҕо саадын тутуута түмүктэннэ. Төһө да уустук кэм буоллар, үлэ барда. Хамсык ыарыы турбутун кэннэ улуус бэйэтин кыаҕынан балыыһаларга күүс-көмө оҥордо. Улуус бүддьүөтүн үбүнэн компьютернай томографияны атыыласпыппыт. Маны таһынан, эмп-том үлэһиттэригэр ыарыыттан көмүскэнэр сириэстибэлэри уонна ИВЛ аппарааттарын улуус дьоно, урбаанньыттар, салалта көмөтүнэн ылан биэрдибит. Бу сыллааҕы бүддьүөппүт уустук соҕус. “АЛРОСА” АХ дивидена кыччаата. Ол да буоллар, былааннаммыт үлэлэрбитин, төһө кыалларынан, түмүктүү сатыахпыт. Саха сирин олохтоохторун Сунтаар улууһун дьонун-сэргэтин аатыттан саргылаах Саҥа дьылынан итиитик-истиҥник эҕэрдэлиибин. Кытаанах доруобуйаны, инникигэ эрэли баҕарабын!
-
0
-
0
-
0
-
0
-
0
-
0
