Мунньахха эһиил ыыттыллыахтаах Саха сирин норуоттарын спортивнай оонньууларын тула кэпсэттилэр. Уус Алдан улууһун баһылыга Алексей Федотов оонньууларга бэлэм бастакы, иккис түһүмэхтэрэ түмүктэнэн, билигин үлэ тэрээһинэ олугун булла диэн эттэ.
– Бүгүҥҥү күҥҥэ улуус киинэ бэйэтэ тутуу улахан былаһааккатыгар кубулуйда. Бу иннинэ күрэхтэһии улууска ыытылларын ситиһии, докумуоннары бэлэмнээһин, инфраструктура сүрүн олоҕун оҥоруу түһүмэҕэ бүппүт буоллаҕына, билигин улахан эбийиэктэрбит тутуулара саҕаланна. Холобур, улахан дьиэни тутаары гыннахпытына, күүстээх хочуолунай наада, улахан хочуолунайы тутаары гыннахпытына, күүстээх уот, элбэх уу ирдэнэр, ону таһарга үчүгэй суол наада, – диэн Алексей Васильевич бэйэ бэйэлэриттэн ситимнэнэн тахсар кыһалҕалары быһаарыыга туох үлэ-хамнас барарын кэпсээтэ.
“Төгүрүк остуол” кэмигэр 2013 сылтан 2020 сылга диэри Уус Алдан улууһугар 72 эбийиэк үлэҕэ киирбитэ этилиннэ. 35 оскуола, 18 хочуолунай, 15 уһуйаан, сэттэ кулууп, сэттэ спортивнай эбийиэк тутуллубуттар. Билигин улуус үрдүнэн уон сэттэ тутуу бара турар. Баһылык этэринэн оонньуулар чэрчилэринэн материальнай-тэхиньиичэскэй тутуу барарын үрдүнэн, духуобунай, өй-санаа өттүнэн эмиэ уларыйыылар киириэхтэрин наадатын тоһоҕолоон эттэ:
– Бастатан туран, улууска оонньуу ыытыллара, иккиһинэн, өрөспүүбүлүкэҕэ автономиятын 100 сылын бэлиэтиир бырааһынньыкпыт улуус дьонун өйүгэр-санаатыгар патриотическай санааны үөскэтиэхтээх. Бу санааҕа тирэҕирэн, сайдыы инники хайысхатын булар олус наадалаах, – диэн баһылык бэлиэтээтэ.
Санатар буоллахха, улуус олохтоохторун уонна бэрэстэбиитэллэрин оонньууларга анаммыт пуондата тэриллибитэ. Манна хас биирдии баҕалаах, улуус олохтооҕо оонньууларга анаан харчыны биэриэн сөп.
Маны таһынан, “төгүрүк остуол” кыттыылаахтара от ыйыгар буолуохтаах Бэчээт күнүн уонна Чэбдигирдии сылын сүрүн тэрээһиннэрин чэрчитинэн иһитиннэриилэри киэҥник тарҕатар сириэстибэлэр үлэлэрин туһунан кэпсэттилэр.
edersaas.ru саайт матырыйаалынан.
-
0
-
0
-
0
-
0
-
0
-
0
