Хааччахтааһын болдьоҕо уһаата
Өрөспүүбүлүкэтээҕи суһал штаб быһаарыытынан, бэс ыйын 25 күнүгэр диэри хааччахтааһын дьаһаллара уһаатылар. Онон дьону аралдьытар уонна сынньатар тэрилтэлэр үлэлэрэ салгыы көҥүллэммэт (түүҥҥү кулууптар, аттракционнар, оҕо оонньуур хосторо уо.д.а.).
Быһыыны ылбыттар араас чэпчэтиилэринэн туһаныахтара
Коронавируһу утары быһыыны ылбыт Саха сирин олохтоохторо араас чэпчэтиилэринэн туһаныахтара. Оннук сонуну өрөспүүбүлүкэ баһылыга Айсен Николаев “Тэтим” араадьыйаҕа, “Саха” НКИХ уонна “Якутия 24” ханааллар биэриилэрин тахсан иһитиннэрдэ.
Саха сирэ бэһис миэстэҕэ сылдьар
Саха сирэ быһыыны ылбыт дьон ахсаанынан Арассыыйа иһигэр бэһис миэстэҕэ сылдьар. “Сыстыганнаах ыарыыны күргүөмнээх вакцинация эрэ тохтотор кыахтаах”, – диэн Ил Дархан үгэскэ кубулуйбут быһа эфиригэр Саха сирин олохтоохторугар туһаайан эттэ.
Аан бастакы буойас Владивостокка айаннаата
Аллараа Бэстээхтэн Тындаҕа уонна Владивостокка диэри тохтобула суох буойас сырыыта олохтонно. Ол курдук, Хабаровскайга диэри 9 чаас, Благовещенскайга диэри 8 чаас, Иркутскайга диэри 5 чаас түргэнник тиийэр кыах үөскээтэ. Ол эбэтэр Владивостокка диэри буойаһынан 2 суукка 13 чаас айаннаан тиийиэххэ сөп буолла.
Ойуур баһаардарыгар эбии үп көрүлүннэ
Бэс ыйын 14 күнүгэр Ил Дархан Үөһээ Бүлүүгэ ыксаллаах быһыы-майгы өрөспүүбүлүкэтээҕи хамыыһыйатын мунньаҕын тэрийдэ. Онно өрөспүүбүлүкэ баһылыга Айсен Николаев экология миниистирин Сахамин Афанасьев “хааһына саппаас пуондатыттан ойуур баһаардарын утары охсуһууга эбии 50 мөл. солк. көрүөххэ” диэн этиитин өйөөтө. Ону сэргэ БЕ-200 сөмөлүөт үлэтин болдьоҕун уһаттарарга диэн биир санааҕа кэллилэр.
Рослесхоз Саха сирин баһаардарыгар 380 мөл. солк. үбүлээһин көрдө. Оннук дьаһалга РФ премьерэ Михаил Мишустин илии баттаата.
Маны таһынан, Ил Дархан Ньурба улууһугар сырыытын кэмигэр нэһилиэнньэлээх пууннарга оҥоһуллубут хоромньуну ааҕарга уонна СӨ Бырабыыталыстыбатын бэрэссэдээтэлин солбуйааччытыгар Дмитрий Садовниковка тустаах көмөнү оҥороллоругар сорудахтаата.
Саамай улахан оскуола
2022 сыл бүтүүтэ Уус Алдан улууһун Бороҕон сэлиэнньэтигэр 2-с №-дээх оскуола саҥа дьиэтэ тутуллан үлэҕэ киирэрэ былааннанар. Бэс ыйын 17 күнүгэр Ил Дархан тутуу хаамыытын кытта билистэ. Бу 450 миэстэлээх аныгы оскуола Уус Алдан улууһугар саамай улахан оскуоланан буолуохтаах.
Спикер болдьоҕун иннинэ уурайда
Бэс ыйын 16-17 күннэригэр Ил Түмэн XXVIII уочарата суох пленарнай мунньаҕар Ил Түмэн Бэрэссэдээтэлэ Петр Гоголев болдьоҕун иннинэ солотуттан уурайарын туһунан дьаһал ылылынна. Манна бэлиэтээн эттэххэ, мантан салгыы Петр Васильевич саҥа тэриллибит Саха сирин Конституционнай сүбэтин салайыаҕа.
-
0
-
0
-
0
-
0
-
0
-
0
