Цифровой көмөлөһөөччү олохтоохтор этиилэрин, кыһалҕаларын туһааннаах былаас уорганыгар тиэрдэр сүрүн соруктаах.
Бу сыһыарыыны хайдах туһанабытый? 51-00-00 нүөмэргэ эрийэҕит уонна инструкциянан сирдэтэҕит: маҥнай ааккытын-суолгутун этэҕит, төлөпүөҥҥүт нүөмэрин “хантаак” быһыытынан туһаналларыгар сөбүлэһэргитин биллэрэҕит, ол кэннэ дьэ этиигитин, туох кыһалҕалааххытын кэпсиигит.
Сыһыарыы искусственнай интеллект баазатыгар айыллыбыт буолан бэрт кылгас кэм иһигэр туһааннаах аадырыска тиэрдэр кыахтаах уонна харда хаһан кэлэрин кэтиир, көрөр-истэр. Киирбит иһитиннэриини (информацияны) маҥнай “One сlick Yakutia” платформаҕа тиэрдэр. Манна сайаапканы ис хоһоонунан, туох кыһалҕаны таарыйарынан көрөн сааһылыыр (классификациялыыр). Ол кэннэ эппиэттиир былаас уорганыгар салайар. Цифровой систиэмэҕэ “хоруй” диэн эппиэт киирдэр эрэ, “AITA” сайаапканы биэрээччигэ эрийэн эппиэти тиэрдэр.
Цифровой көмөлөһөөччү үчүгэйэ диэн, суукканы быһа тохтообокко үлэлиир. Инньэ гынан олохтоохтор үлэ чааһыгар эрэ буолбакка, бэл, оннооҕор түүн кытары кыһалҕаларын, наадаларын кэмтэн тутулуга суох этинэр кыахтаахтар. Маны таһынан сервис үлэтин схемата судургутуйда. Өскөтүн урукку өттүгэр электроннай ньыманан сайаапканы биэрэргэ “One сlick Yakutia” платформаҕа киирэн “веб-форманы” хайаан да толорор эбит буоллаххына, билигин цифровой көмөлөһөөччү бэйэтэ быһа оҥорор.
“AITA” үлэлээн саҕалыаҕыттан олохтоохтортон номнуо 800 этии, ыйытыы киирбит. Дьону ордук долгутар сүрүн кыһалҕаларынан олох-дьаһах, хомунаалынай хаһаайыстыба боппуруостара, хаарбах туруктаах дьиэттэн көһүү, гааһы киллэттэрии, суолу өрөмүөннээһин, социальнай көмөнү (өйөбүлү) туһаныы, коронавирус дьаҥыттан быһыыны ылыы туһунан уо.д.а. буолаллар.
Бу саҥа арыйыы олохтоохторго туһалаан эрэр. Холобур, дьон субсидиялаах билиэти атыылаһарыгар көмөлөспүт. “AITA”-ҕа 1 группалаах инбэлиит Арсений Винокуров тахсыбыт. Эдэр киһи “Москуба-Дьокуускай” маршрутунан субсидиялаах билиэти кыайан булбакка олорбут. Көтөр хампаанньаттан ыйыталаһан көрбүтүн “сайын устата чэпчэтиилээх билиэт атыыга тахсыбат, бүппүтэ” диэн аккаастаабыттар. 51-00-00 нүөмэргэ эрийэн, “AITA”-ҕа тахсыбыт. Көрдөһүүтэ Тырааныспар министиэристибэтигэр тиийэ охсон кылгас кэм иһигэр кыһалҕата быһаарыллыбыт. Арсений Дьокуускайга этэҥҥэ көтөн кэлэн олорор.
Олоххутугар уустук түгэн, кыһалҕа үөскээтэҕинэ, “AITA”-ҕа эрийэн “этиниэххитин” сөп. Баҕар, кыһалҕаҕыт, чахчы, биир-икки күн иһигэр быһаарылла охсуо дии.
-
0
-
0
-
0
-
0
-
0
-
0
