Иһиллээбит чуумпуну кэрэни кэрэхсээбит иһирэх санаа иилии кууста, суһуктуйуу борук-соругун күлүм -чаҕыл сардаҥа сэргэхситэ сэгэлдьиттэ, уһугуннара уунаҥнатта. Күрүлэс куйаастан күлүкпэр киирэн куотуҥ, сатыылаабыт куйаастан лаглаҕар лабаабар саһан сэбирдэҕим сөрүүнүн үллэстиҥ дуу диэбиттии алаас хотуна, сыһыы далбара аар хатыҥ оргууй-оргууй сибигинэйэр, иһиллэр-иһиллибэттик сибис гынар.
Арыы тыа саҕатыгар бүччүм сиргэ мааныланан үүммүт үрүҥ субатын үтүөтүн солко сэбирдэххэ суулаан, кэрэчээн сэбэрэтин салыбырастаах ытарҕатынан ситэрэн ыалдьыттыы барардыы ыга киэргэммит, ситэри симэммит эдэрчи хатыҥнар сиэттиһэ-сиэттиһэ сэлэлии хаамтылар, тутуһа-тутуһа бөлөх-бөлөх муһуннулар. Чэчик чэмэличчи көрдө, силиһигэр сүмэһинэ түмүлүннэ, сэбирдэҕэр күүһэ-уоҕа мунньулунна, эминньэҕэр эмэ-томо эбилиннэ.
Кэмин аайы кэрэтийэ эбилиннэ, күнүн аайы күндүмсүйэ киэргэннэ, ситэн-хотон, сиртэн сэниэ эбинэн, айыылартан анаммытынан абырыаҕа, ыйыллыбытынан үрүҥ тыыны салҕыаҕа. Хаамтахпыт аайы харысхаллаах, тирэннэхпит аайы эмтээх сибэккилээх, тайаннахпыт аайы томтоох оттоох аар айылҕабыт барахсаҥҥа мээнэҕэ диэнэ суох, хааларга-ааһарга анаммыта суох, си буолуохтааҕар сиппитэ-хоппута суох... Киниэнэ барыта кимтэн-туохтан диэн туоһулаах, тоҕото эппиэттээх, хаһан диэҥҥэ хардалаах, туһуламмыкка туһалаах.
Харыстаатахха, харайдакка, көрө-истэ, бүөбэйдии сырыттахха ис иһиттэн ситэриллэн, ситии быалыы хатыллан, атын дойдуттан салҕаммакка, туспа дойдуттан тутулуктаммакка бэйэ киэнэ бэйэҕэ буолан, олорорго анаммыт мындыртан мындыр аар айылҕабытыгар сүгүрүйүөҕүҥ. Саҥа күнүнэн сэгэрдээр!
Хаартыска: https://vsegda-pomnim.com/priroda/10154-priroda-jakutii-letom-76-foto.html
- 1
- 0
- 0
- 0
- 0
- 0