«РФ Бырабыыталыстыбата 3-7 саастаах оҕолордоох, кыра дохуоттаах ыаллары өйүүр миэрэтэ улаатар. Бу ыалларга ыйын аайы босуобуйа төлөнөр, бу социальнай өйөбүл миэрэтигэр эбии 55 млрд солк. аныыбыт. Санатар буоллахха, бу иннинэ көрүллүбүт 200 млрд солкуобай эрэгийиэннэринэн тыырыллыбыта», -- диэн РФ Бырабыыталыстыбатын бэрэссэдээтэлэ Михаил Мишустин иһитиннэриитин ТАСС таһаарбыт.
Бэрэсидьиэн Владимир Путин Федеральнай Мунньахха туһаайбыт Анал этиитигэр кыаммат ыаллары аадырыстаан өйүүр наадалааҕын ыйбыта. «Ол иһин босуобуйаны анааһын быраабылатын хаттаан көрөн, көмө кээмэйэ дьиэ кэргэн дохуотуттан тутулуктаах гынныбыт. Сорохтор биир оҕолоругар эрэгийиэҥҥэ олохтоммут тиийинэн олоруу алын кээмэйин саҕа босуобуйаны ылыахтарын сөп», -- диэн премьер-миниистир бэлиэтээбит.
- 0
- 0
- 0
- 0
- 0
- 0