Киһи уонна сокуон

Өскөтүн сокуону иккистээн кэһэр түгэҥҥэр, итиэннэ ааспыттааҥҥы кулуумбаларын хомуйбатах буоллаххына, ыстыраап 3000 солкуобайга диэри үрдүүр. Оттон салайар хампаанньа көрбөтөх эбэтэр бэйэтэ сибэккини олордубут уонна кэмигэр хомуйбатах буоллаҕына – ыстырааба 100-250 тыһ. солк. Маннык сокуону РФ Айылҕа баайыгар уонна экологияҕа министиэристибэтэ туруорсубута ыраатта. Тоҕо диэтэххэ, эргэ эрэһиинэлэр тулалыыр эйгэҕэ, дьоҥҥо буортулара улахан: куһаҕан канцерогеннары таһаара сыталлар эбит. Онон мантан ыла туттуллубут көлөһө эрэһиинэтэ сытар буоллаҕына, бөххө бырахпахха, биитэр туһаҕа таһаарбакка, шиномонтажтарга 50 солк. туттарыахтаахпыт.

Кюннэй РОЩИНА, Уус Алдан улууһа: –Бороҕоҥҥо көһөн кэлиэхпиттэн сибэкки олордор буолбутум. Бастаан кыралаан, онтон 2022 сылга улууспутугар ыытыллыахтаах Оонньууларынан сибээстээн, быйыл бэлэмнэнии курдук, сибэккилэрбин элбэттим. Көлөһө эрэһиинэтин урут туттааччым. Ол эрээри иллэрээ сылтан үчүгэй көрүҥнээх кашполарга олордор буолбутум. Эрэһиинэни туттууга ыстырааптыыр сокуон тахсыбытын билбэт эбиппин. Хата, олордубат буолбутум үчүгэй эбит. Бу саҥа үйэҕэ наһаа кырасыабай кашполар маҕаһыыннарга атыыланаллар, сыаналара даҕаны удамыр. Эбэтэр маһынан оҥотторуоххутун сөп.

Наталья ГРОМОВА, Өймөкөөн улууһа: –Сибэккини үүннэрэн бөҕө буоллаҕа. Билии күнүгэр атыылаһааччылар даҕаны бааллар. Көлөһө эрэһиинэтин ончу туттубаппын. Ыстырааптанар буолбуттарын билбэппин даҕаны. Хата, билэр дьоммун сэрэтииһикпин. Мин сибэкки үүннэрэрбэр эргэ хоппуруон эбэтэр пластмасса биэдэрэлэри киэргэтэн, итиэннэ кашполары туһанабын.

Виктор СКОРОХОДКИН, Уус Алдан улууһа: –Сүрүннээн 6-7 көрүҥ куруутун олордор сибэккилэрбин сэргэ, 5-6 арааһынай саҥа суортары үүннэрэбит. Көлүөһэни сибэккигэ, үүнээйигэ олох туттубаппын. Ол эрэһиинэтин туттууга сокуонунан ыстыраап баар буолбутун Интэриниэккэ көрөн билбитим. Чэчиктэрбин хаптаһынтан оҥоһуллубут хоруудаларга эбэтэр маҕаһыынтан ылыллыбыт көһүйэлэргэ үүннэрэбин. Ютубтан үтүктэн, сиэмэнтэн бөҕө-таҕа иһит оҥорон боруобалыыр санаалаахпын.

Нюргуяна СТЕПАНОВА, Чурапчы улууһа: –Сибэккини ис-испиттэн сөбүлээн олордобун, бүөбэйдиибин. Көлөһө эрэһиинэтэ буортулааҕын билэр буолан туттубаппын. Ол эрээри ыстырааптыыр сокуон тахсыбыта интэриэһинэй баҕайы эбит дии. Тыа киһитэ барыны бары туһаҕа таһаара сатыыра буруй буоллаҕай? Бары дэлэгэй олохтоох буолбатах буоллахтара дии. Тус бэйэм сибэккилэрбин араас кашполарга, сиргэ бэйэтигэр олордобун.

Яна СИВЦЕВА, Чурапчы улууһа: –Сибэккини үүннэрэбин. Көлөһө эрэһиинэтин туттааччыбын. Эрэһиинэни туһанааччылары ыстырааптыыр сокуон баар буолбутун истибитим, ол иһин иккиттэн биирэ диэбит курдук, күһэлэҥ быһыытынан, бэлэм эбэтэр профлиистэн оҥоһуллубут кашполары, итиэннэ мас хорууданы туттар буоллум. Итиэннэ сиргэ бэйэтигэр таастарынан күрүө курдук оҥоробун.

Екатерина МОЛОКОТИНА, Дьокуускай куорат: –Куоракка көһөн кэлиэхпиттэн, тиэргэннээх буоламмыт, сибэкки үүннэриинэн үлүһүйэр буоллум. Сиэн кыргыттарым даҕаны кэрэ сибэккилэри көрөн, хаартыскаҕа түһэн астыналлар. Көлөһө эрэһиинэтин туттабын, ол эрээри ыстырааптыыр сокуон тахсыбытын туһунан истибэтэҕим, муода эбит. Дьонтон эмиэ харчы ылбыт эрэ киһи диэн таһаардахтара эбитэ дуу? Баҕар, эрэһиинэ буортулааҕынан эбитэ дуу? Оннук ыстырааптыыр буоллахтарына, эһиил күтүөппүн сибэкки олордор иһиттэри оҥорорго соруйууһукпун.

Мария ГОГОЛЕВА, Амма улууһа: – Сибэкки үүннэриинэн биһиги улууска баһаам киһи дьарыктанар. Куонкурус даҕаны элбэх. Бэйэм көлөһө эрэһиинэтин туттубаппын, ыстырааптыыр сокуон тахсыбытын тута билбитим. Биир дьарыктаах дьоммун сэрэппитим. Дьоммор этэн, олус үчүгэй иһиттэри оҥотторбутум, итиэннэ кашполары туһанааччыбын.