Оскуола үөрэҕириитин ситимин модернизациялааһыҥҥа тэрээһиннэри олоххо киллэрии хаамыытын СӨ Бырабыыталыстыбатын бэрэссэдээтэлэ Андрей Тарасенко ыыппыт сүбэ мунньаҕар дьүүллэстилэр. Булуҥ, Орто Халыма, Таатта, Хаҥалас, Нам, Бүлүү, Горнай оройуоннарын уонна Дьокуускай куорат дьаһалталарын бэрэстэбиитэллэрэ үлэ хаамыытын туһунан сиһилии кэпсээтилэр.
Мунньах кэмигэр оборудованиены, тутуу матырыйаалларын миэстэтигэр тиэрдиини уонна үөрэх кэмигэр тутуу хайдах барыахтааҕын туһунан сытыы боппуруостары дьүүллэстилэр. Оттон оскуолаларынан оҕолорго анаан үөрэх уонна иитии матырыйаалларынан, оборудованиенан хааччыйыыга бары аукционнар биллэриллэн тураллара билиннэ. Ону тэҥэ, былааннаммыт 99 дуогабартан икки дуогабар сотору кэминэн түһэрсиллэрэ күүтүллэр. Бу сыл атырдьах ыйын 1 күнүгэр диэри хапытаалынай өрөмүөҥҥэ уонна оборудованиены, миэбэли былааннаммыт болдьоххо тиэрдиигэ үлэлэр булгуччу түмүктэниэхтээхтэр.
- Үлэни тэрийиигэ уонна хонтуруолга ыларга, улуустарынан министиэристибэлэр уонна биэдэмистибэлэр исписэлиистэрэ көһө сылдьар мунньахтары тэрийэллэрэ былааннанар, – диэн Андрей Тарасенко бэлиэтээтэ.
Санаттахха, 2023 сыллаахха «Оскуола тиһигин модернизациялааһын» федеральнай бырагырааманан Саха Сирин 26 муниципальнай тэриллиилэригэр 57 эбийиэк саҥардыллыахтаах, ол иһигэр 15 эбийиэк Аартыка зонатыгар киирэллэр. Бу сыалга 2 576,67 мөл. солк. суумалаах федеральнай субсидия, ол иһигэр 37 саҥа эбийиэккэ 2 219,78 мөл. солк. үп-харчы көрүлүннэ. Ону тэҥэ тутууга 2 сыл болдьохтоох 20 эбийиэккэ 356,89 мөл. солк. тыырылынна.
-
0
-
0
-
0
-
0
-
0
-
0
