Ордук уустук балаһыанньа Кальвица нэһилиэнньэлээх пууҥҥа үөскээтэ. Бэҕэһээ, ол эбэтэр атырдьах ыйын 8 күнүгэр, ыкса киэһэ олохтоохтору көһөрүүгэ метеор уонна паром айаннаабыта. Таатта Ытык Күөлүгэр үлэлии сылдьар Ми-08 уу кутар тэриллээх бөртөлүөт суһаллык көппүтэ.
Бу иннинэ, атырдьах ыйын 7 күнүгэр, Сангаар бөһүөлэгин нефтебазатыгар 1,5 килэмиэтирдээх сиргэ чугаһаан улаханнык ыксатан турар. Ми-08 уу кутар тэриллээх бөртөлүөт үлэлээбитэ. Нэһилиэнньэҕэ эвакуация биллэриллибэтэҕэ. Сангаар уотун утары 40-ча киһи, 6 тиэхиньикэ үлэлээбитэ. Билигин да үлэ тохтообокко барар.
Кэбээйи улууһун баһылыга Иван Левин эрдэ иһитиннэрбитинэн, оройуоҥҥа үс нэһилиэнньэлээх пууҥҥа – Сангаарга, Сииттэҕэ уонна Кальвицаҕа – баһаардар кутталы суоһууллар.
Наталья Винокурова, Кэбээйи улууһун Куокуй нэһилиэгин баһылыга:
– Кальвицаҕа олус уустук балаһыанньа үөскээн турар. Бэҕэһээ уот кабелыттан барбыт баһаар иккис бөһүөлэкпитигэр –Кальвицаттан Арҕас диэки – ойуурунан айаннаан иһэр. Бу турбут уот Кальвица бөһүөлэгин барытын эргийдэ. Сирбит буора торфалаах буолан кыайан умуллан испэт. Кальвица тула күөдьүйэн тахса турар. Ол уоттар дьон олорор дьиэлэриттэн 30-40 миэтирэлээх сиргэ бааллар. Ыстаансыйабыт 100-чэ миэтирэлээх сиргэ турар. Нэһилиэнньэ ахсаана – 98 киһи. Олортон 67 киһи, этэргэ дылы, турардыын-турбаттыын бары суукканы быһа тохтоло суох үлэлээн уоттарын тута сатыыллар. Олус күүстээх тыал түһэ турар, ол уустугу үөскэтэр. Кальвица, Арҕас бөһүөлэктэрэ – түҥ ойуур сирдэр. Уопсайа 4 тус-туһунан биригээдэ үлэлиир. Дьахталлар эмиэ . Онон, нэһилиэнньэ утуйар уутун мунан төһө күүһэ-кыаҕа тиийэринэн үлэлиир. Бэйэбит эрэ соҕотох буолбатахпыт. Өрөспүүбүлүкэ салалтата кыах баарынан көмөлөһөргө бэлэм.
- 0
- 0
- 0
- 0
- 0
- 0