Бу үс нэһилиэнньэлээх пууҥҥа үһүөннэригэр уоту утары улахан үлэ барар турар. Олохтоохтор күнү-түүнү аахсыбакка, суукканы быһа атахтарын үрдүгэр туран, уоту кытта охсуһаллар. Ми-08 ууну кутар тэриллээх бөртөлүөт бүгүн Кальвица бөһүөлэгэр үлэлии сылдьар.
Кэбээйигэ турбут улахан уоттар тустарынан Кэбээйи, Үөһээ Дьааҥы уокуруктарын дьокутаата Михаил Ильич Эверстов санаатын бу курдук үллэстэр:
– Кэлиҥҥи 2-3 күҥҥэ күүстэх тыал түһэн, уот хат күөдьүйэн тахсан, онно эбии “верховойга” кубулуйан, улахан ыксаллаах быһыыны-майгыны үөскэттэ. Быйыл үгүс сылларга буола илик улахан кураан сайын буолла. Айылҕаны кэтээн көрөн үөрэтэр научнай киин үлэһиттэрэ бэлиэтээбиттэринэн, 1,5 үйэҕэ буолбатах кураан үһү. Бу эргин улуустарга от ыйыгар баара-суоҕа 1,5 см. халыҥнаах сөҥүү түстэ. Инньэ гынан сир буораах курдук бытарыйан түһэр, от-мас, сир-дойду оннук кууран-хатан турар.
Саха сиригэр биир гектар тыаны харайарга 6 солк. көрүллэр эбит буоллаҕына, атын эрэгийиэннэргэ – 196 солк. Ол эбэтэр биһиэхэ көрүллэр харчы атыттарга тэҥнээтэххэ, 30 төгүл кыра. Ил Дархан кыаҕа баарынан тиһиктээх үлэни ыытар. От ыйын бүтүүтэ дойду Бэрэсидьиэнэ В.В. Путины кытта быһа сибээһинэн мунньахха кыттарыгар, Саха сирин баһаардарын кыһалҕатын киэҥник хабан сырдаппыта, кэккэ этиилэри туруорсубута. Владимир Владимирович кини этиитин өйөөбүтэ, үлэ бара турар.
Төрөөбүт-үөскээбит дойдубун – Кэбээйини -- кытта сибээспин тута олоробун. Сангаар бөһүөлэгин баһылыга Николай Поповы кытта бу кэпсэтэн бүттүм. Күҥҥэ хаста да эрийэн, балаһыанньаны билсэ олоробун. Бөөлүүн бэйэм эмиэ Кэбээйиттэн айаннаан кэлбитим. Бу баһаардар кэмнэригэр хаста да баран кэллим. Сангаар баһаара Нефтебазаҕа чугаһаан, улаханнык ыксата сырытта. Күүстээх үлэ түмүгэр бэҕэһээ уҕарыттылар. Ил Дархан Айсен Николаев, СӨ Бырабыыталыстыбатын бэрэссэдээтэлин маҥнайгы солбуйааччы Д.Д. Садовников балаһыанньаны иһиттэн билэн-көрөн, тиһиктээх үлэни ыыта, дьаһайа олороллор. Олохтоохтор эмиэ биир киһи курдук турунан, төрөөбүт дойдуларын быыһыыр туһугар күнү-түүнү аахсыбакка үлэлииллэр. Түгэни туһанан, “Сахапарламент” саайт нөҥүө кинилэргэ барҕа махталбын тиэрдэбин!
-
0
-
0
-
0
-
0
-
0
-
0
