Ытык Күөл баһылыга Егор Павлов кэпсиир:
-Бүгүҥҥү кэпсэтии быһыытынан, Ханин карьерын хоту өттүнэн утары уот ыытарга быһаарынныбыт. Дьон-сэргэ мунньустан, онно таҕыстылар. ГАУ “Лесресурс” уонна куораттан кэлбит доброволецтар, итиэннэ МЧС-тар, олохтоох нэһилиэнньэ күүстэринэн үлэ бара турар. Буруо-тараа бөҕө буолла. Балаһыанньа хонтуруолланар гынан баран, ыарахан. Онон Куула түөлбэ, даачалар эҥээр бэлэм олоруҥ, ханнык баҕарар түгэҥҥэ хайдах баҕарар эргийэн тахсыан сөп.
Дьохсоҕон баһылыга Петр Захаров:
-Даккыга бэҕэһээ былааннаммытын курдук үлэлэрбитин ыыттыбыт. Маах хайатын үрдүгэр хоммут уот бүгүн Чабыыда үрэххэ бэс ыйын 27 күнүгэр турбут 7А нүөмэрдээх баһаарга холбосто. Манна Дьокуускайтан кэлбит МЧС-тар, Тулагы, Табаҕа, Жатай бөһүөлэктэриттэн баһаарынай сулууспа уолаттара, Даккы учаастак олохтоохторо, Ытык Күөлтэн, Боробултан көмөҕө кэлбиттэр үлэлээтилэр.
- Өлөҥнөөххө үлэлээбиттэр
Уот тохтоото. Дьокуускай баһаарынайдара түүн хаалан кэтээтилэр. Кэтээһин бүгүн да салҕанар. Сыгынахтары, көрдүгэннии сытар төҥүргэстэри умуллардахпытына, дьэ, биирдэ олох тохтуохтаах. Бүгүҥҥү, бэҕэһээҥҥи умуруоруу үлэтэ уустук этэ. Тыал соҕурууттан уонна соҕуруулуу-илинтэн күүскэ үүрэр буолан, Даккыга кутталы үөскэппитэ. Ону түмсүүлээх, биир өйүнэн салаллан, сүбэни тутуһан, ордугу-хоһу тылласпакка, туора-туспа толкуйдаабакка, үчүгэйдик сомоҕолоһон үлэлээтибит. Айылҕабыт иччилэрэ да арчылаатылар. Куттал суоһаабат диэн бигэ эппэппит, син биир куттал баар. Тохтообут курдук буолаллар, 2-лии күн ардах түспүтүн да кэнниттэн күөдьүйээччилэр. Онон балаһыанньаны хонтуруолга тута сылдьыахпыт.
Дьокуускайга олорор таатталар түмсүүлэрин бэрэссэдээтэлэ Владимир Аржаков:
-Бэҕэһээ куораттан көмөҕө дьону хомуйан ыыттыбыт. Доброволецтар ыстааптарын салайар Афанасий Алексеев күүс-көмө буолла. Мэр Евгений Григорьев оптуобус уларыста. Бырабыыталыстыба бэрэссэдээтэлин солбуйааччы Дмитрий Садовников паром тутатына илдьэрин хааччыйда. Дьокуускайга олорор таатталар 354100 солкуобайы начаас хомуйа оҕустулар. Махталым кинилэргэ улахан. Ол үп сорҕотунан 50 ранец (РЛО) ылан ыыттыбыт. Билигин да харчы киирэ турар. Көмө оҥоро туруохпут. Нэһилиэктэр түмсүүлэрэ эмиэ бэйэлэрэ туспа харчы хомуйан ыыттылар.
- 0
- 0
- 0
- 0
- 0
- 0