--Тыалбыт, дьэ, сүрдэннэ, айылҕабыт барахсан, чахчы, ыраастанан эрэр. Билигин уоту оройуон киинигэр Ытык Күөлгэ киллэрбэт гына үлэ бара турар. Ол эрээри уоппут аны Даккыга атаакалаан эрэр. Барыта моһуоктаах соҕус. Түүлээх баһаара Хара Алдаҥҥа чугаһыыр, тыала илинтэн буолан, хамсааһына, сыҕарыйыыта бытаан.
Буойа үрэҕин уот куотта диэбиттэрэ, ол информация чуолкайдана илик. Үөһэнэн облет буоллаҕына көстүөҕэ. Чымынаайы уонна Харбалаах өттүн тыала хотугулуу, соҕуруулуу илинтэн буолан, кыайа туттулар диэххэ сөп. Ол эбэтэр оҥоһуллубут опашканы үрдүнэн уот барбатын курдук үлэлэр ыытыллыннылар.
Бэҕэһээ Боробул олохтоохторо уот ханан умайарын кэтээн көрбүт буоллахпытына, бүгүн биллэ биһиги диэки чураһыаҕа. Тыалбыт сүрдээх күүстээх, онон балаһаны уот нөҥүөлээбитин умулларыыга кэтээһин үлэлэрэ ыытыллаллар.
Күүстээх уот Туора Дулҕа үрүйэтигэр хонно, биир сатарах салаата кэлэн, Егор Егорович Чербоев базатын таһыгар минерализованнай балаһаҕа иҥнэн тохтоото. Кэлбит бириэмэтэ да киэһээрэн, налыйан кэлэн иҥиннэ. Ол эрэн ити уоту көрүөхпүт чаас иннинэ квадрокоптер (дрон) көтүтэн көрбүппүтүгэр, килэмиэтиринэн тэйиччи умайар этэ. Олох көрүөх бэтэрээ өттүгэр уот ол сири саба сиэн кэлбитэ.
Бүгүн күүстээх үлэ Ытык Күөл өттүгэр ыытыллыаҕа. Биһиги минерализованнай балаһабыт кэннинэн уоту кэтээн, Таатта куулатынан Боробулга кэлиэхпит. Валерий Саввин сирдьиттээх сухаһыттар Тимофей Потапов, Игорь Харайданов икки тыраахтарынан уонна Кэнчээри Петров көмөлөһөөччүлээх кустарнай суханан минбалаһа оҥорон иһэллэр. Билиҥҥи туругунан бааһыналары кэннилэринэн Хаастаах кэтэҕэр кэллилэр. Бу уолаттар Өлөҥнөөххө диэри тиэрдэр соруктаахтар. Онтон Ытык Күөлтэн биир дойдулаахпыт Иван Константинович Максимов кэлэн, ол балаһаны салгыы Дьиэбэгэнэ куулатынан тардан, Атырдьах Аартыгар тиэрдиэхтээх. Эрдэ былааннаммыт Сиэллээх үрэҕинэн Төҥүттэҕэ түһэн, Харбалаахха тахсар балаһаны тарда охсубатахпытына, уот куотар куттала баар. Билигин баар үгүс техника бары Ытык Күөл тулатыгар сүрүннэниэхтэрэ. "Лесавиа" ДТ 75 тыраахтара бэҕэһээ Үрүҥ Оҕус үрүйэтигэр уот куоппутун күөйэ сылдьан, уот сылааһыттан бааҕа суоһаан, бааҕыттан умайан тахсан, уокка былдьанна, тырахтарыыс бэйэтэ этэҥҥэ.
Балаһыанньа, чахчы, уустук. Уот салгыы тарҕамматыгар үлэлэһэ сылдьар нэһилиэгим олохтоохторугар, ыччаттарбытыгар уонна баҕа өттүнэн көмө буола бэйэтин тиэхиньикэтинэн кэлбит биир дойдулаахпытыгар Федор Михайлович Мочкиҥҥа барҕа махталбын биллэрэбин. Күндү доҕоттор, бу күннэргэ ыксаллаах быһыы-майгы сытыырхайар түгэнигэр, иһитиннэрии оҥоруоҕум, оччотугар бары тахсан, уоту утары үлэҕэ турунуохпут. Бары бүттүүммүт күүһэ - модун күүс.
-
0
-
0
-
0
-
0
-
0
-
0
