--Баһаар сезона саҕаланыаҕыттан өрөспүүбүлүкэбитигэр 1419 баһаар турбута бэлиэтэнэр. Итинтэн 1401 баһаара ойуур судаарыстыбаннай пуондатыгар (гослесфонд) ааҕыллар, 2 баһаар итиннэ киирсибэт атын категориялаах сиргэ-уокка, 16 баһаар ураты харыстанар территорияҕа (иэнэ --30 тыһ 382 га). Күн бүгүн Саха сиригэр 174 баһаар умайа турар. Иэнэ -- 3 мөл. 911 тыһ. га.
Баһаар сезона саҕаланыаҕыттан уот сиэбит сирин уопсай иэнэ 6 мөл. 629 тыһ. га-ҕа тэҥнэстэ. Былырыын сайын ойуур 1729 баһаара баара, умайбыт иэнэ 4 мөл. 57 тыһ. га этэ. Быйыл кураан сайын буолан, баһаар суоһуур кылааһа үрдүк, онон ити көрдөрүүбүт улаатта.
Бу баһаардары умулларыыга Саха сирин лесопожарнай формированиелара үлэлии сылдьаллар уонна федеральнай ППС-тар. РФ Бэрэсидьиэнэ В.В. Путин сорудаҕынан, Саха сиригэр 200 киһилээх группировка көмөҕө кэллэ. Мииринэй “Полярнай” аэропордуттан кэлбит 40 киһини Намҥа илдьэн биэрдибит. Кэлэр бөлөҕү Чурапчыга таһаарыахпыт. Мэлдьэхсигэ. Түүн кэлээччилэри Горнай баһаардарыгар үлэлэтиэхпит. Суһал ыстаап бу 17.00 чаастааҕы мунньаҕынан кэккэ нэһилиэктэргэ куттал суоһаабат үлэтин ыыта сылдьаллар. Билигин балаһыанньа Хаҥалас Үөдэйигэр уустук. Улуус баһылыга Олег Иринеев эбии миэрэлэри туруоруста. Ол курдук, тиһиликтээх (гусеничнай) тыраахтардары көрдүүр. Ону РИК “Автодортан” ылан ыытыахпыт. Биробиджантан кэлбит десантниктар дуогабардарын уһатарга эттэ. Аны туран, доброволецтар ыстааптарыттан дьону көмөҕө ыҥырар. Координатор Ольга Григорьева мобилизацияҕа дьон бэлэмин биллэрдэ.
Баһаардары барытын хонтуруолга тутабыт. Киинтэн улахан күүс кэллэ – МЧС-тартан, Миноборонаттан. Ону таһынан анал тиэхиньикэлэр кэллилэр. Ол эрээри балаһыанньа тыҥааһыннаах. Олохтоох нэһилиэнньэ кыах баарынан көмөлөһөр – баһаарга тэҥҥэ сылдьыһан, үбүнэн, аһынан. Таатталары, сунтаардары бэлиэтиэхпин баҕарабын. Бары түмсэн, күүспүтүн холбоон, бу ааҥнаабыт алдьархайы кыайыахпыт.
-
0
-
0
-
0
-
0
-
0
-
0
