--Бастакы боппуруос -- баһаары умуруора сылдьар дьон уоттан сэрэхтээх буолууларын туһунан.
-- Бэҕэһээ Чурапчы баһаарыгар Мэҥэ Хаҥалас суолун оҥорсо сылдьыбыт Элбаги Игитян диэн тырахтарыыс умайан өлбүт сураҕа барыбытын соһутта, хомотто. Чугас дьонугар дириҥ кутурҕаммытын тиэрдэбит. Дьиэ кэргэнигэр, биллэн турар, көмө оҥоруохпут. Сэрэхтээх буолуу баһаарга бастакы күөҥҥэ турар. Чуолаан идэтийбит баһаарынньык буолбатах доброволецтарга бу сыһыаннаах. Салайааччылар инструктаһы булгуччу ыытаргытын умнумаҥ. Эһиги уонна дьону баһаарга ыыппыт тэрилтэлэр эппиэтинэһи сүгэргитин өйдөөҥ. Билигин бу дьыаланан силиэстийэ ыытылла турар.
-- Баһаар бүгүҥҥү балаһыанньата хайдаҕый?
-- Балаһыанньа тыҥааһыннаах. Бүгүн 63 баһаары умуллара сылдьабыт. Иэнэ – 1 мөл. га-тан тахса. 13 нэһилиэнньэлээх пууҥҥа уот киирээри куттуур. Горнай, Нам, Уус Алдан, Чурапчы, Кэбээйи улуустарыгар балаһыанньа уустук. Күн бүгүн баһаары бохсууга 5000 тыһ. киһи үлэлии сылдьар: Миноборонаттан—128, МЧС-тан – 300, “Лесавиаохранаттан” – 1000-тан тахса, итинтэн биһиэттэрэ – 250, доброволецтар –300 уонна олохтоох нэһилиэнньэ. Барыта 700 тиэхиньикэ туһаныллар, ол иһигэр МЧС уонна Миноборона көтөр ааллара. Мииринэйгэ буруо арыый астан, “Бе-200” уонна “Ил-76” арҕааҥҥы улуустарга үлэлээн эрэллэр. Сүрүн сорукпут – нэһилиэнньэлээх пууннарга уот киириитин тутуу, тохтотуу. Онуоха кутталлаах нэһилиэктэргэ группировкалар хомуллан тэрилиннилэр. Хата, тыалбыт арыый намыраата.
-- Буруо бүгүн Дьокуускайга сүрдэннэ дии.
-- Дьону өйдүүбүн, кырдьык, билигин тыынарга ыарахан күннэр-дьыллар. Буруо Нам уонна Горнай баһаардарыттан кэлэр. Онно эбии утары уот ыытаннар, өссө хойунна. “Отжиг” диэн ньыма хайаан да оҥоһуллуохтаах. Баһаалыста, ону өйдүү сатыыргытыгар көрдөһөбүт. Тыалбыт хайысхата аҕыйах күнүнэн уларыйаыв. Оччоҕо күммүтүн көрүөхпүт, оттон билигин тулуйуохпутун наада. Нам баһаара уһун субурҕа гына умайа сытар. Ол туоратынан кэтирээтэҕинэ, букатын куттал суоһуур. Ол иһин 100 км усталаах хоруу, минерализованнай балаһа хаһа сылдьаллар, уот утары ыыталлар.
-- Көмө киинтэн төһө кэллэ?
-- Кэнники күннэргэ көмө кэлэ турар. В.В. Путинныын кэпсэтээппин кытта, бэҕэһээ МЧС 200 байыаһа көмөлөһө кэллэ. Олор сорохторо Намҥа үлэлии сылдьаллар. Сорохторун Горнайга, Хаҥаласка ыытыахпыт. МЧС миниистирэ Евгений Зиничев кэлиэхтээх. Кинилиин кэпсэтэрбэр, эбии бөртөлүөт көрдөөбүтүм. Бу күннэргэ ыытыахтаах. Дьокуускай аэропордун көтөр балаһатын бетон бүрүөһүнэ куура-хата турар. Атырдьах ыйын 20 күнүгэр диэри кытаатыа дииллэр. Оччоҕо, саатар, быстах кэмнээх көҥүлү ылан, байыаннай көтөр ааллары түһэриэхпит этэ. Уһук Илин боломуочуйалааҕа Юрий Трутнев 150 мөл. солк. суумаҕа ДТ-75 тыраахтары ыларбытын өйөөтө. Балаһыанньа уустук. Өтөрүнэн буолбатах кураан сатыылаата. Дьоммор-сэргэбэр этиэм этэ, ойуурга-тыаҕа барымаҥ. Булт кэмэ өрөспүүбүлүкэбитигэр ыксыллаах быһыы-майгы эрэсиимэ уһулуннаҕына биирдэ эрэ көҥүллэнэр. Үлэ биэрээччилэр үлэһиттэргитин, кыаллар буоллаҕына, дьиэҕэ олордон үлэлэтэ сатааҥ.
-
0
-
0
-
0
-
0
-
0
-
0
