Билиҥҥи туругунан, Нам оройуонун баһаардарыгар 400 киһи уонна 34 тиэхиньикэ үлэлиир. Баһылыгы солбуйааччы Филипп Николаев иһитиннэрбитинэн, Таастаах баһаара нэһилиэктэн 3 килэмиэтирдээх сиргэ тэйиччи баар. Көбөҥҥө сүрүннээн Тарҕана диэн сиргэ умайар. Баһаар арҕаа өттө Фрунзеттан 4 килэмиэтирдээх, оттон хоту өттө Көбөкөнтөн 4 килэмиэтирдээх сиргэ баар. Манна 226 киһи үлэлиир.
Фрунзе нэһилиэгин баһылыга Роман Трофимов баһаар балаһыанньатын бу курдук кэпсиир:
– Атырдьах ыйын 13 күнүнээҕи туругунан, улахан баһаар нэһилиэнньэлээх пуунтан 4 килэмиэтирдээх сиргэ тохтотуллан турар. Сир хорутуллубута. Билигин күннэри-түүннэри кэтии-маныы олоробут. Соҕуруу диэки сыҕарыйан, билигин бары күүспүтүн онно уурдубут. Уот киирбэтин диэн, арҕаа өттүн быстыбыт. Киэҥ солооһун кэрдэ сылдьабыт. Баһаар тураатын кытта, сарсыҥҥы күнүттэн олохтоохтору көһөрөн саҕалаабыппыт. Нэһилиэкпититтэн 51 киһини атын нэһилиэнньэлээх пууннарга ыыппыппыт, ол иһигэр 15 оҕону, 3 инбэлиити. Манна 37 киһи хаалбыта, 20-тэн тахса киһи – баһаарга үлэлиир дьон. Карелияттан “Авиалесоохрана” тэрилтэ 20 үлэһитэ кэлэн, уоту утары үлэҕэ кыттыста. Баһаарынай сулууспа 3 массыыната нэһилиэк территориятыгар турар, балаһыанньаны кэтиир-маныыр.
Нам олохтоохторо: “Бу маннык уустук, быһаарыылаах кэмҥэ биир дойдулаахтарбыт күүс-көмө буолаллар”, -- диэн киэн тутта этэллэр. Ол курдук, Ил Түмэн Судаарыстыбаннай Мунньах бэрэссэдээтэлэ Алексей Еремеев Нам сиригэр-уотугар маҥнайгы баһаардар турааттарын кытта, тута көмөлөһөн барбыта. Уоту утары үлэҕэ уопсайа 100 000 солк. суумалаах көмөнү оҥордо. Нам оройуонун дьаһалтата, олохтоохторо Алексей Ильичка истиҥ махталларын, үтүө баҕа санааларын тиэрдэллэр.
-
0
-
0
-
0
-
0
-
0
-
0
