--Ол эрээри үлэбит бытаарда. 4-5 суукканан бүтэрэр былааммыт туолбатах биричиинэтэ биир – күһүҥҥү күннэр тураннар, сиик түһэн, күҥҥэ 2-4 чаас эрэ утары уоту ыытар үлэ барар. Сайын сылааска, 7-с нүөмэрдээх баһаар турбут кэмигэр, температура табыгастаах этэ. Онон усулуобуйа биһиэхэ утары үлэлээтэ. Ардах билигин тохтуон наада, ол кэнниттэн сарсыҥҥыттан алта күннээх ардах, сэттэ күннээх самыыр төһө баҕарар түстүн.
Дьоммут-сэргэбит долгуйаллар, туох да сибээс суох буолан, уолаттар хайдах сылдьалларын билээрилэр. Уолаттар этэҥҥэлэр, биир дьиэ кэргэн курдук, тутуспутунан үлэлии сылдьаллар. Туруоруллубут сыалы, садаачаны кэмигэр сөптөөхтүк, хаачыстыбалаахтык толорорго үлэлэһэллэр.
Биһиги иллэрээ күн сылдьарбытыгар, киэһэ Сиэллээх Ураһатыттан киирэр аартыкка тиийбиттэр эттэ. Нэһилиэкпит олохтооҕо Д.Р.Захаров уолаттарга убаһа биэрэн, эт илдьэн, буһаран сиэтилэр. “Этэҥҥэ барыта”, -- диэн илдьиттииллэр. Харбалаахтан иһэр утары биригээдэбит үлэтин саҕалаабыт. Бэҕэһээ киэһэ “Лесавиа” Тааттатааҕы салаатын салайааччыта Аркадий Борисович Жуковы кытта кэпсэттим. Атырдьах ыйын 15 күнүнээҕи түмүгүнэн, 5 км биэрэстэ хаалбыт, икки биригээдэ төгүрүктээн көрсөрө. Бүгүн ардах мэһэйдээбэтэҕинэ төгүрүктүөхтэрэ.
Утары уот ыытан баран, тохтообокко кэтиир үлэни ыыта сылдьабыт. Манна көмөҕө диэн, Дьокуускай куораттан 26 доброволец кэлэн барда. Араас улуустан. Бу уолаттар үчүгэй баҕайытык үлэлээтилэр. Эдэр ыччат төрөөбүт дойдутугар бэриниилээх, кыһалҕа тирээтэҕинэ көмөлөһөргө бэлэмнэриттэн үөрдүбүт. Өрөспүүбүлүкэ үрдүнэн хас да улууһунан маннык бөлөх үлэлии сылдьар. Биһиги Сахабыт сирин ыччата үтүө өйдөөх-санаалаах эбит диэн астынным. Холобура, бу кэлбит уолаттартан биирдэ даҕаны ойуурга сылдьыбатах, биирдэ даҕаны балааккаҕа хоммотох, Дьокуускай куорат нууччалыы саҥарар уолаттара кытта баалар. Ол эрээри өрөспүүбүлүкэҕэ уопсай иэдээн буолбутугар, кинилэр туора турбаккалар, доброволецтары түмэр ыстаапка тиийэн: “Биһиги көмөлөһө барабыт”, -- диэн тылланан кэлбиттэр. Доброволецтарга ис сүрэхпиттэн махтанабын, -- диир Дьохсоҕон баһылыга Петр Захаров бүгүҥҥү илдьитигэр.
-
0
-
0
-
0
-
0
-
0
-
0
