Улуус дьокутааттарын Сэбиэтин бэрэссэдээтэлэ Афанасий Захаров кэпсээбитинэн, Чурапчы баһаардарыгар барыта 322 киһи (242 – олохтоохтор, 5 - “Авиалесоохрана”, 20 – баһаарынай ыстаансыйа үлэһиттэрэ, 65 – МЧС ) үлэлии сылдьаллар.
Көмөҕө Тулаттан эбии 50 быыһааччы кэлбит. 24 киһитин Хайахсыкка, 26-тын Мугудайга ыыппыттар. Дьокуускайтан 29 волонтер, астарын-үөллэрин, малларын-салларын барытын тиэйбитинэн тиийбиттэр. 15 киһитин Хайахсыкка, 14 волонтеру Мугудайга атаарбыттар. Минерализованнай балаһа оҥорорго көмөлөһүөхтэрэ.
Мобильнай биригээдэлэр Мэлдьэхсигэ, Мугудайга уонна Хайахсыкка үлэлии сылдьаллар. Тыраахтардар, водовозтар, баһаарынай массыыналар сүүрэллэр.
Суһал ыстаапка норуот дьокутаата Михаил Гуляевтыын айылҕа харыстабылын миниистирин солбуйааччы Семен Яковлев үлэни сүрүннэһэр.
Чурапчыттан төрүттээх биир дойдулаахтара, олохтоох нэһилиэнньэ көмөлөрө улаханын Афанасий Захаров бэлиэтиир. Ол курдук, сыланнар бородуукта ыыппыттар, Арыылаахтан, Кытаанахтан, улуустааҕы киин балыыһаттан, о.д.а. үбүнэн-аһынан көмө киирэ турар.
“Сахастройгрупп” тэрилтэ салайааччылара Иван уонна Дмитрий Федуловтар 1 туонна сэлээркэ, “Восток-Капитал” (сал. Гаврил Дьячковскай) ранецтары, Чурапчы түмсүүтэ, урбаанньыттар харчы хомуйан биэрбиттэр. Иван Макаров 100 тыһ. солк. суумалаах карточка аһан, ону уматык куттарга туһаналлар.
Дириҥ, Мугудай, Хадаар, Хайахсыт олохтоохторо көмөлөспүт бар дьонугар махталларын биллэрэллэр.
-
0
-
0
-
0
-
0
-
0
-
0
