Антонина Григорьева Өрөспүүбүлүкэ парламенын аатыттан Доброволецтар ыстааптарын нөҥүө Бэс Күөлүн ойуур баһаарыттан эмсэҕэлээбит олохтоохторугар утуйар таҥастары тиэртэ. Гуманитарнай көмө норуот дьокутааттарын уонна Ил Түмэн аппаратын үлэһиттэрин харчыларынан хомуллан оҥоһулунна.
Ил Түмэн вице-спикэрэ СӨ Уопсастыбаннай ыстаап доброволецтарын кытары кэпсэттэ, кинилэр этиилэрин, көрдөһүүлэрин иһиттэ. Ол курдук, бензопилалар, күрдьэхтэр, сүгэлэр уонна да атын тутуллар сэптэр тиийбэттэр эбит.
Билигин ойуур баһаарын утары үлэҕэ 1200 доброволецтар кытталлар, ол иһигэр устудьуоннар, байыаннай дьайыылар бэтэрээннэрэ, сулууспалаахтар бааллар. Атын эрэгэйиэннэртэн кэлбит волонтердар элбэхтэр – Уфа, Петропавловск-Камчатскай, Чебоксар, Москва, Хабаровск, Фокин куораттан кэлбиттэр. Арассыыйа араас муннугуттан харчынан көмө ыыталлар.
Антонина Афанасьевна Камчатка кыраайыттан көмөҕө кэлбит Валентина Косованы кытта көрүстэ. Кини Петропавловск-Камчатскайтан Дьокуускайга диэри аара массыыналарга олорсон кэлбит. Валентина Косова туризмҥа аан дойду таһымнаах сэртипикээттээх инструктор буоларын быһыытынан баһаары кытары охсуһууга көмөтө көдьүүстээх буоларыгар эрэнэр.
Ил Түмэн аппаратын үлэһитэ Мария Васильева уонна норуот дьокутааттарын көмөлөһөөччүлэрэ Доброволецтар ыстааптарыгар волонтердууллар, көмө буолаллар.
Санатар буоллахха, Ил Түмэн дьокутааттара уонна парламент аппаратын үлэһиттэрэ хомуйбут харчыларынан көмө бастакы баартыйатын Доброволецтар ыстааптарыгар атырдьах ыйын 12 күнүгэр тиэрдибиттэрэ. Гуманитарнай көмө быһыытынан бородуукталары, туттуллар малы-салы, ууну, мааскалары, респиратордары тиэрдибиттэрэ.
Маны таһынан туонна оттук ылар каартаны, харыстанар сириэстибэлэри, респиратордары, ачыкылары, бензопиланы Эдэр парламентарийдар Таастаах нэһилиэгин дьаһалтатыгар илдьибиттэрэ.
Ол курдук Саха өрөспүүбүлүкэтин парламена уот алдьатыылаах күүһүн кытары охсуһууга көмөнү оҥорорун салгыыр.
-
0
-
0
-
0
-
0
-
0
-
0
