Норуот дьокутаата Юрий Николаев Садын олохтоохторун кытары көрсүһүүтүгэр ойуур баһаарын умулларыыга үлэлээбит олохтоох дьоҥҥо харчынан бириэмийэ туттарда. Парламентарий волонтердарга, баһаарынайдарга махталын тиэртэ уонна уот оҥорбут урусхалын туоратарга көмөлөһүөх буолла.
Саха сиригэр турбут ойуур баһаарыгар Мииринэй оройуонун Садын (Сүлдьүкээр) нэһилиэгин сирэ эмиэ эмсэҕэлээбит. Сэлиэнньэттэн 22 км. сиргэ бэс ыйын 22 күнүгэр уот турбут. Олохтоох нэһилиэнньэ уоту умуруорууга туруммут. Бурятияттан уонна Читаттан көмөҕө кэлбит этэрээти кытта сүлдьүкээрдэр 20 км. усталаах балаһа хаспыттар, утары уот ыыппыттар уонна мастары кэрдибиттэр. Дьахтар аймах күнүстэри-түүннэри ойуур баһаарын кытта охсуһар дьоҥҥо аһылыктарын астаабыттар. Уот нэһилиэккэ 2 км. сиргэ чугаһаабыт, ол эрээри баһаарынайдар уонна олохтоох дьон туруулаахтык үлэлээн, уоту нэһилиэккэ киллэрбэтэхтэр.
Юрий Николаев Мииринэй оройуонун сиригэр ойуур баһаара турбут сирдэрин кэтээһиҥҥэ кыттыбыт. Манна турбут баһаардар атырдьах ыйын 26 күнүгэр букатыннаахтык умуруоруллубуттар.
Дьокутаат ойуур баһаарын умуруруорууга кыттыбыт, нэһилиэктэрин туруулаһан көмүскээбит алта олохтоох дьоҥҥо тус сириэстибэтиттэн харчынан бириэмийэни туттарда: Горностаева Фатима Федоровнаҕа, Егорова Людмила Егоровнаҕа, Николаева Тамара Владимировнаҕа, Никифоров Александр Ивановичка, Чоноев Сергей Сергеевичка, Саввинов Евгений Александровичка.
Юрий Николаев Мииринэй оройуонугар оробуочай сырыытын кэмигэр Чернышевскай, Светлэй бөһүөлэк нэһилиэнньэлэрин кытары көрүстэ, Билии күнүн үөрүүлээх бырааһынньыгар кытынна, ыччат активын кытары көрүстэ.
-
0
-
0
-
0
-
0
-
0
-
0
