– Арҕааҥҥы дойдулар сааҥсыйа киллэриилэринэн сибээстээн, экэниэмикэҕэ үөскээбит тыҥааһыннаах быһыыны-майгыны холкутатар туһугар дойду Бырабыыталыстыбата тустаах дьаһаллары ылар. Эрэгийиэннэртэн барыларыттан, ол иһигэр Саха Сириттэн, этиилэр түмүллэннэр, оробуочай бөлөх тустаах хамыыһыйаларыгар көрүллүөхтэрэ. Киирбит этиилэр олоххо киллэриллиэхтэригэр эрэнэбин, – диэтэ Айсен Николаев мунньах түмүгэр.
Саха Өрөспүүбүлүкэтин Бырабыыталыстыбата дьоһун суолталаах кэккэ этиилэри оҥорбут.
Бастатан туран, кыһыҥҥы суол сабыллыар диэри өрөспүүбүлүкэ олохтоохторун хааччыйарга тимир суолунан Аллараа Бэстээххэ диэри кэлиэхтээх аһы-үөлү уонна күннэтэ туттуллар табаары ураты чорботуллар таһаҕас быһыытынан көрөн, урутатан аҕалар ирдэнэр. Ону таһынан тимир суолунан Уһук Илиҥҥи федеральнай уокурукка тиэрдиллиэхтээх таһаҕаһы таһыыга көрүллэр чэпчэтиини кэҥэтэр, онно Илин Сибиирдээҕи тимир суол «Лена», «Лена-Восточная» уонна «Аллагуват» ыстаансыйаларыттан кэлиэхтээх таһаҕаһы эбии киллэрэр тоҕоостоох.
Хотугу собуос туһунан боппуруоска өрөспүүбүлүкэ Өлүөнэтээҕи өрүс пароходствотын ааллара Таймыр тумул арыыны эргийэ айанныылларыгар Карскай уонна Лаптевтар муораларын аквоторияларын географическай кыраныыссаларын кэҥэтэргэ эттэ. Билигин Мурманскайтан Певеккэ диэри Хотугу муора суолунан айанныыр ааллар үгүс мэһэйи көрсөллөр, кинилэргэ курдары ааһар маршрут наада.
Омук сиригэр оҥоһуллубут сөмөлүөттэри солбуйарга SSJ-100 паарканы чөлүгэр түһэриэххэ. «Якутия» авиахампаанньа маннык аалларга Уһук Илин биир бөдөҥ оператора буоларынан, SSJ-100 мааркалаах сөмөлүөттэри көрөр-истэр, саппаас чааһынан хааччыйар тиэхэньиичэскэй киин тэриллиэн наада.
Олохтоох маршруттарынан көтөр сөмөлүөттэргэ бырайыас сыаната үрдээбэтин диэн, Уһук Илин уонна Арктика эрэгийиэннэрэ федеральнай бүддьүөттэн субсидия көрөргө эттилэр. Оттон бырамыысыланнас эйгэтигэр судаарыстыба хантараагын чэрчитинэн тутуллар социальнай, инфраструктурнай эбийиэктэр кэмигэр үлэҕэ киирэллэригэр уопсай тарҕаммыт сир баайын хостооһуҥҥа лиссиэнсийэни биэрии процедуратын болдьоҕун кылгатар наадатын бэлиэтээтилэр. Бу туһунан Ил Дархан уонна Бырабыыталыстыба пресс-киинэ иһитиннэрдэ.
-
0
-
0
-
0
-
0
-
0
-
0
