Арассыыйаҕа киирэн эрэр саҥа энерготарыыптары тэҥниир мэхэньиисим Уһук Илин энэргиэтикэтин туругун балачча уларыппытын, дьүүллэһии барбытын, ол иһин РФ Бырабыыталыстыбата ньиэби, кыһыл көмүһү хостуур тэрилтэлэргэ компромисснай быһаарыыны ылыммытын туһунан РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев иһитиннэрдэ.
«Билигин Саха сирин бүддьүөтүгэр ити үбү компенсациялааһын хайдах бара турарын, эбии үп көрүллэрин бэрэбиэркэлиибит. Тоҕо диэтэххэ, бүгүҥҥү мунньахха санаалар уратылаахтара көһүннэ. Үп министиэристибэтэ бүддьүөттэр икки ардыларынааҕы бэрээдэктээһин мэхэньиисимин оҥорууга барытын учуоттаабыппыт диир эрээри, өрөспүүбүлүкэ салалтата атын дааннайы этэр. Онон икки нэдиэлэ иһигэр Үп министиэристибэтэ, Энэргиэтикэ министиэристибэтэ, Федеральнай антимонопольнай сулууспа уонна өрөспүүбүлүкэ өттүттэн тэҥнээн көрөн түмүгү биэрэллэригэр сүбэлэстибит», – диэтэ Юрий Трутнев.
Юрий Трутнев дойду креативнай технологияларын атыылааһынын 75 %-ын Саха сирэ ыларын билэрин эттэ, ити таһымы ыһыктыбакка өссө салгыы сайыннарарга баҕарарын уонна бу хайысхаҕа өрөспүүбүлүкэ улахан кылааты киллэрэрин бэлиэтээтэ.
Салгыы Бэрэсидьиэн Уһук Илиҥҥэ боломуочуйалаах бэрэстэбиитэлэ байыаннай-патриотическай иитиини күүһүрдэргэ анаан дойду үрдүнэн Үөрэтэр-эрчийэр комплекстар арыллыахтарын, Саха сирэ Аҕа дойду Улуу сэриитигэр снайпердарынан аатырбытын, кинилэринэн киэн туттарын эттэ.
Кини «Маннык аныгылыы комплекстары тэрийии үрдүк кылаастаах байыастары бэлэмнииргэ уонна Ийэ дойдуну көмүскүүргэ көмөлөһүө диэн эрэнэбин», – диэн тоһоҕолоон бэлиэтээтэ. Саха сиригэр биир кэлим субсидиянан элбэх бөдөҥ эбийиэк тутулунна. Холобур, Кардиология киинэ, «Үлэ кыбартаала» креативнай кылаастыр курдук Уһук Илин тэҥэ суох эбийиэктэр үлэҕэ киирдилэр. Аны эһиил Онкология киинэ киирэрэ былааннанар.
Ол туһунан Ил Дархан Айсен Николаев: «2018 с. өрөспүүбүлүкэҕэ бу мэхэньиисиминэн 11 млрд. солк. инвестицияламмыта, онтон 9 млрд. солк. — федеральнай үбүлээһин. Кэлэр сылга 2,5 млрд. солк. федеральнай бүддьүөттэн көрүлүннэ. Эһиил өссө 19 эбийиэк эбилиннэ, онон Нерюнгригэ доруобуйа харыстабылын үс эбийиэгэ, Чульмаҥҥа саҥа оскуола тутуута, Дьокуускайга, Мииринэйгэ, Алдаҥҥа түөрт успуорт саалата, о.д.а тутуллуо», – диэтэ. Ил Дархан Айсен Николаев РФ Бэрэсидьиэнэ Владимир Путин быһаччы дьаһалынан, Уһук Илиҥҥэ боломуочуйалаах бэрэстэбиитэл Юрий Трутнев өйөбүлүнэн былырыын баһаартан эмсэҕэлээбит Горнай улууһун Бэс Күөлүгэр Култуура киинэ тутуллуоҕун бэлиэтээн эттэ.
-
0
-
0
-
0
-
0
-
0
-
0
