«Смарт Юнит» хампаанньа ойуур баһаардарын утары кэлим бырагырааманы оҥорбут. Килиимэт, экология, күн-дьыл туругун, тыа хайысхатын, күүһүн тустарынан чахчылары автоматическай эрэсииминэн ылар кыахтаах бу систиэмэ өрөспүүбүлүкэ суһал сулууспаларыгар туһаныллар. Айсен Николаев быһаарбытынан, бу бырагыраама ойуур баһаарын анаалыстыырга, кэтээн көрөргө бэрт көдьүүстээх эбит. Юрий Трутнев бу бырагырааманы баһаардары утары охсуһар дьаһаллар бырагыраамаларыгар киллэрэргэ итиэннэ атын эрэгийиэннэргэ баар бастыҥ барыллары эмиэ учуоттуурга эттэ.
– Араас эрэгийиэннэргэ мониторинг элбэх систиэмэтэ оҥоһуллубута, олортон бастыҥнарын ылан туһаныахха наада. Холобур, «Смарт Юнит» бу кэлим бырагырааматын ыксаллаах быһыы-майгы эрэсииминэн ыытыллар үлэҕэ холбуохха сөп, – диэтэ вице-премьер.
«Саха сирин паромнара» бырайыак өрүһү туоруур паромнар сырыыларын туһунан нэһилиэнньэҕэ биллэрэргэ-иһитиннэрэргэ, онон паром өҥөтүн тупсарарга анаммыт. «Цифровой помощник AITA» бырайыак ОДьКХ, дьиэлэри тупсаран оҥоруу, субсидия, доруобуйа харыстабылын эйгэлэригэр нэһилиэнньэ этиилэрин түмэр, уһуйааҥҥа биитэр оскуолаҕа киирэр оҕону манна суруйтарыахха сөп. Онон AITA күннээҕи кыһалҕаны быһаарарга көмөтө улахан. «Extra Cinema» бырайыак чэрчитинэн, атырдьах ыйыгар 10 нэһилиэнньэлээх пууҥҥа дьоҕус киинэ тыйаатырдара арыллыахтаахтар. Үс сыл устатыгар 112 нэһилиэнньэлээх пууҥҥа дьоҕус киинэ тыйаатырдарын арыйар сорук турар. «Якутия» венчурнай хампаанньа дириэктэрэ Василий Ефимов ИТ-паарка резиденнэрин үп-харчы өттүнэн өйөөһүн туһунан кэпсээтэ. Бастакы түһүмэххэ өйөбүлү 21 хампаанньа ылбыт, биэс бырайыакка 10-нуу мөл., 16 хампаанньаҕа 5 мөл. солк. бэриллибит, барыта 130 мөл. солк. көрүллүбүт. Өйөбүл иккис түһүмэҕэ кэлэр ыйга көрүллүөхтээх эбит.
– Экэниэмикэ сайдыытыгар көмөлөһөр буолан, IT-технологиялары өйөөһүн Саха сиригэр, Уһук Илиҥҥэ эрэ буолбакка, бүтүн дойду үрдүнэн улахан суолталаах. IT-технология экэниэмикэ сайдыытыгар көмөлөһөр. Элбэх бырайыактар күннээҕи олоххо олус наадалаахтарын эһиги ИТ-паркаҕыт резиденнэрин үлэлэрэ үчүгэйдик көрдөрөр, – диэтэ Юрий Трутнев.
Санатан эттэххэ, «Дьокуускай» ИТ-паарка 2018 сыллаахха аһыллыбыта, Уһук Илиҥҥэ үрдүк технология бастакы паарката буолбута. ИТ-паарка резиденин быһыытынан 88 хампаанньа үлэлиир, кинилэр истэринэн 336 үлэ миэстэтэ таһаарылынна. Сыллааҕы дохуоттара биир миллиард солкуобайга тиийдэ диэн Ил Дархан уонна Бырабыыталыста пресс-сулууспата иһитиннэрэр.
Хаартыскаҕа Мария Васильева (ЯСИА) түһэриитэ
-
0
-
0
-
0
-
0
-
0
-
0
