Ол иһигэр, ардаҕы искусственнайдык түһэрии, баһаары утары охсуһууга үп көрүллүүтүн улаатыннарыы ойуурга уот туруутун биллэрдик аҕыйаппытын эттэ.
– Владимир Путин былырыын ойуур баһаарын сэрэтиигэ, умуруорууга туруорбут соруктарын барытын олоххо киллэрбиккит. Үбүлээһини таһынан ойуур баһаарын бохсууга кыттар дьон ахсаанын элбэппиккит, анал тиэхиньикэлэри ылбыккыт итиэннэ ойуур баһаарын ахсаанын түөрт төгүл, уот хаппыт сирдэрин иэнин 14 төгүл аччатары ситиспиккит. Уһук Илиҥҥи федеральнай уокурук дойду сирин-уотун 40 %-ын ылар, нэһилиэнньэлээх пууннар олус ыраах сыталлар, инньэ гынан ойуурга турар уоту умуруоруу олус уустук. Ойуурга уот саҥа туран эрдэҕинэ умуруорар улахан оруоллаах, онон уоту умуруоруу бастакы сууккаҕа 60-тан 80 %-ҥа диэри тиэрдиллэрин, салгыы 100 % буоларын ситиһиэххэ наада, – диэтэ Юрий Трутнев.
Айсен Николаев олус ыраах сытар уонна суола-ииһэ суох түҥ тыаларга турбут уоту эрдэттэн билэн, бохсуу уустуктардааҕын бэлиэтээтэ. Бэрэсидьиэн сорудаҕын олоххо киллэрии чэрчитинэн, маннык зоналары түһүмэхтэринэн аччатыы үлэтэ ыытылларын эттэ. Холобур, 2023 сылга ойуур хаһаайыстыбалара көрөр-истэр тыаларын чэрчитин 20 мөл. гектарынан улаатыннарыллыахтаах. Ойуур пуондата 255 мөл. гектар иэннээх сири хабар буоллаҕына, онтон 50 мөл. гектардаах тыа эрэ көрүллэр-истиллэр, ити иһин көрүүгэ-истиигэ хабыллар зонаҕа көһөрүллэр сир иэнин биллэрдик кэҥэтэр ирдэнэр эбит.
– Туруоруллубут соруктары ситиһэргэ саҥа авиаотделениелары уонна ойуур баһаарын ыстаансыйаларын арыйар, үлэлиир дьон ахсаанын элбэтэр, анал тэрилинэн уонна тиэхиньикэнэн хааччыйыыны тупсарар, онуоха ойуур сыһыаннаһыыларын салаатыгар бэриллибит боломуочуйалары толорууга көрүллэр субвенция үбүн улаатыннарар наада, – диэтэ Ил Дархан.
Саха сиригэр быйыл 180 тыһ. гектар тыаны хаппыт 395 ойуур баһаара уонна 17 тыһ. гектар тыаны хаппыт 22 ландшафтнай (айылҕа) баһаара регистрацияланна. Былырыын баччаларга 2,4 мөл. гектар сири хаппыт 1 188 ойуур баһаара регистрацияламмыта. Атыннык эттэххэ, ойуур баһаарын ахсаана үс төгүл, уот хабар иэнэ 14 төгүл аччаабыт. Салгынтан патруллааһыҥҥа 5 көтөр аал, баһаарынньыктары таһыыга 3 бөртөлүөт үлэлиир. «Авиалесоохрана» ФБТ "Ан-26" сөмөлүөтэ бэс ыйыттан саҕалаан былыттары түмэн ардаҕы түһэрбитэ, Росгидромет зондировщик сөмөлүөттэрэ ыам ыйын 14 күнүттэн 23 көтүүнү оҥорбуттара. Ардахтатыы ойуурга уот туруутун сэрэтиигэ улахан көдьүүстээҕэ көһүннэ. Бу туһунан Ил Дархан уонна Бырабыыталыста пресс-сулууспата иһитиннэрэр.
Хаартыскаҕа Андрей Сорокин (ЯСИА) түһэриилэрэ
- 0
- 0
- 0
- 0
- 0
- 0