Бэлиитикэ

- Дойдубут Бэрэсидьиэнэ Владимир Путин Анал этиитин болҕойон иһиттим.

Эрдэ ватсап ситимигэр Украинаҕа сэриини биллэриэ, анал байыаннай эпэрээссийэ статуһун уларытыа диэн түөйэллэрэ, оннук буолбата. Мин саныырбар, ол сөп. Тоҕо диэтэргин, сэриини биллэрии буоллаҕына, арҕаа дойдулар хаба тардан ылан, Арассыыйаны чахчы агрессор курдук ылыныахтара этэ. Украинаҕа көмөлөһөрбүт саамай сөптөөх диэн ытыалаһалларыгар кыах биэрбэтэҕэ өйдөнөр. Ол эрэн арҕааҥҥы дойдулар ыраах тэбэр - “дальнобойнай” сэбиргэллэрин биэрэллэр, ол ракеталарынан биһиги сирбитигэр түстэхтэринэ, тэйитэр кыахтаахпытын эттэ. Өссө Киевтан ыраатыннаран, арҕаа да кыраныыссаҕа тиийиэхпит, оннук балаһыанньаҕа биһигини киллэриэххитин сөп диэн сэрэтии оҥордо. Ити эмиэ өйдөнөр.

Мин сэргээн истибитим, анал эпэрээссийэҕэ сылдьар буойуннарбыт статустарын тэҥнээһин. Ол эбэтэр, баҕа өттүнэн эбэтэр ыҥырыынан барбыттар, хантараак түһэрсибиттэр диэн хас да суолга араарыы тохтуохтаах. Барыларыгар биир тэҥ өйөбүл оҥоһуллуохтаах диэн Владимир Путин эттэ. Бу иннинэ арыый буккуур баара сааһыланна дии саныыбын.

Буойуттарбыт дьиэ кэргэттэригэр көмөнү Бырабыыталыстыба өссө  толкуйдаан, үлэ күүһүрүө. Биир даҕаны киһи болҕомтото суох хаалыа суохтаах.  Онуоха анал пуонданы тэрийии саамай сөптөөх быһаарыныы. Бу иннинэ сорох боппуруостарга сэлээннэһии баара иһиллэрэ. Бэрэсидьиэммит Анал этиитигэр чуолкайдык быһаарда.

Биһиги “бэһис колоннабыт” диэн ааттанар дьоннорго тохтоото. Кинилэри сыҕайар дуу, кыраныысса таһыгар үүрэр дуу санаа суоҕун эттэ. Арҕаа дойдулар курдук “охота на ведьм” биллэрбэппит диэн эппитэ эмиэ олохтоох. Үҥсүү-хаңсыы, бэйэ-бэйэни кынчыаттааһын, хобу-сиби тарҕатыы табыллыбат. Отутус сыллары эргитэрбит туох даҕаны үтүөнү аҕалбата чуолкай.

Олигархтарга, ол эбэтэр баай дьоммутугар, туһаайан анал эпэрээссийэттэн саҕалаан, дойду иһигэр буолар быһыыга-майгыга бэйэҕит санааҕытын, позицияҕытын чуолкайдааң, быһатын эттэххэ, “определяйтесь с кем вы” диэн эппитэ оруннаах. Билигин сорохтор туора дьон курдук тутта сылдьаллар. Сорохтор отой даҕаны бэйэлэрин биисинэстэрин нөҥүө быһаччы өстөөхө көмөлөһөр түгэннэрэ иһиллэр. Билигин ити дьоннор иннилэрин-кэннилэрин көрүнэр, учуоттуур кэмнэрэ көстөн кэлэрэ буолуо.

Биисинэс сайдарыгар усулуобуйа тэриллиэхтээҕин эттэ. Чуолаан “айти” салааларга чэпчэтии  олохтооһун. Маныаха эттэххэ, биһиги дьоннорбут, бэрт элбэх “айти” флагманнара  дойду таһыгар үлэлииргэ күһэлиннилэр. Холобур, чугастыы “Индрайвер”, “Майтона”, о.д.а. Итинник син биир тахсыаҕа. Ону тохтотор тустаахпыт диэбитин өйүүбүн.

Анал этиигэ дойду иһинээҕи быһыыга-майгыга, элбэх оҕолоох дьиэ кэргэттэри өйөөһүҥҥэ тохтоото, ол эмиэ сэҥээрдэр.

Арҕаа дойдулар кимэн киирэр “информационнай сэриилэрин” кэмигэр ыччаттарбытын үөрэтиигэ улахан болҕомто ууруллуохтаах. Маныаха үөрэҕирии эйгэтигэр кичэллээхтик уонна сарсыҥҥы күнү учуоттаан туран ,бырагырааммалар уларыйыахтаахтар. Арассыыйа үрдүнэн биллэриллибит Педагог уонна настаабынньык сылыгар оҕолорбутугар  дойдуларын историяларын үчүгэйдик билэллэригэр күүс ууруллуо. Историяны дьэҥкэ өйдөөн, онтон тэбинэн, патриоттуу өйдөөх-санаалаах дьон иитиллэн тахсалларыгар болҕомто ууруллуо. Бу уруккуттан да бэйэм санаам этэ, онон бу этиини олох толору өйүүбүн.