– Күүстээх үлэ барар турар. Быыбардааччыбыт ахсаана – 8026. 22 быыбардыыр учаастагы толору оргтехниканан, матырыйаалларынан хааччыйдыбыт. Бэйэни харыстанар сириэстибэлэр кэллилэр, – диэн баһылык кэпсээтэ.
Гаврил Ильич сэрэхтээхтик куоластааһыны тэрийэргэ анал сэминээрдэр ыытыллыбыттарын бэлиэтээтэ. Быыбардыыр учаастактар 130 үлэһиттэрэ бары инструктаж ааспыттар. Ону таһынан отучча киһини саппааска үөрэппиттэр. Ыраах бөһүөлэктэргэ икки сүүсчэкэ киһи хайдах быһыылаахтык куоластыырын быһаарбыттар.
– Нэһилиэнньэ куоластааһыҥҥа бэлэм. Көхтөөхтүк кыттыахтара диэн эрэлбит улахан. Улуус дьаһалтата быыбардыыр хамыыһыйалары тырааныспарынан хааччыйыа. Онон дьиэҕэ куоластааччылартан сайаапкалары хомуйабыт. Туох баар итэҕэстэри-быһаҕастары тута миэстэтигэр быһааран иһэбит, – диэн Гаврил Ильич бэлиэтээтэ. Куоластааһын кэмигэр Үөһээ Дьааҥы улууһугар сүүсчэкэ волонтер уонна кэтээн көрөөччү үлэлиэхтэрэ.
Санатан эттэххэ, дойду бэрэсэдьиэнэ Владимир Путин от ыйын 1 күнүн – өрөбүл күнүнэн биллэрбитэ. Онон ханна да тиэтэйбэккэ, нус бааччы баран куоластыырбытыгар бары усулуобуйа олохтоммута.
- 0
- 0
- 0
- 0
- 0
- 0