Бэлиитикэ

Сэбиэт Федерациятын аграрнай бородууксуйатын бэлиитикэтигэр уонна айылҕаны туһаныыга кэмитиэтин бэрэссэдээтэлин солбуйааччы Егор Борисов «Дойдуга тыа хаһаайыстыбатын кээпэрээссийэтин сайыннарыы: кыһалҕалар уонна инники кэскиллэр» диэн тиэмэҕэ төгүрүк остуолу салайан ыытта.

Сенатор этэринэн, тыа хаһаайыстыбатын бородууксуйатын оҥорон таһаарыыга дьоҕус тэрилтэлэр суолталара уонна көхтөөх сайдыылара, ону тэҥэ судаарыстыбаттан өйөбүллэр кээпэрэтииптэри тэриийигэ сытар.

- Пиэрмэрдэри уонна биирдиилээн дьону кээпэрэтииптэргэ холбоон, сокуон хараҕынан ирдэнэр конкуреннаһар, хаачыстыбалаах бородууксуйаны оҥорон таһаарыыны тэрийэргэ уонна наадыйааччыга тиэрдиигэ саҥа усулуобуйалары үөскэтэр. Маны таһынан, ордук элбэх кууһунан бородууксуйалары оҥорон таһаарыыга уонна бигэ туруктаахтык хааччыйыыга, ол иһигэр бөдөҥ атыы-эргиэн хампаанньалары кытта ыкса мэктиэлээхтик үлэлэһэргэ саҥа ньымалары таһаарар, — диэн бэлиэтиир сенатор.

Егор Борисов кээпэрээссийэ сайдыыта сүнньүнэн тыа сирин сайыннарыытыгар, нэһилиэнньэ олоҕун хаачыстыбатын үрдэтиигэ, саҥа бородууксуйалары оҥорорго, үлэ миэстэтин таһаарыыга уонна матырыйаалынай-тиэхиньиичэскэй баазаны тупсарыыга, ол иһигэр судаарыстыбаттан көмөну туһанарга соруктанарын ааттаата. Итини сэргэ, эт аһылыгын оҥорон таһаарыы кээмэйин улаатыннарыыга, тыа хаһаайыстыбатын бородууксуйатын тэрийиигэ, араас атыы-эргиэн ханаалларын арыйыыга, логистика уонна ыскылаат инфраструктураларын төрүттээһиҥҥэ туһуланар.

- Биир киһиэхэ билигин сүөһүнү тутар, ону таһынан сири оҥорор, бородууксуйаны оҥорон таһаарар олус уустук. Оттукка, саппаас чааска сыана үрдүк. Ол иһин билигин нэһилиэк таһымыгар кээпэрээссийэни тэрийэр наада. Бу сыалга араас сокуоннар үлэлииллэр, нуормалыыр баазата оҥоһуллубута, ол эрээри, ону барытын «санныгар сүгэр» баҕалаах дьон аҕыйах. Ыччаппыт тыа хаһаайыстыбатынан биир эрэ усулуобуйаҕа дьарыктаныаҕа – элбэх дохуот киллэринэр буоллаҕына. Егор Афанасьевич уопуттаах салайааччы, кини тыа хаһаайыстыбатын салаатын ис кыһалҕатын, инники кэскилин уонна биир хайысхаҕа тирэҕирэн күн бүгүҥҥэ диэри дьаныардаахтык туруорсар.  Тыа хаһаайыстыбатын уонна тыа сирин кээпэрээссийэ эрэ быыһыыр кыахтаах. Кини дойду таһымыгар сийиэс ыытыллыытын көҕүлээбитэ уонна быйыл саас өрөспүүбүлүкэтээҕи сийиэһи тэрийбитэ. «Муус хамсаата» дии саныыбын, сорох нэһилиэктэр баһылыктара уонна исписэлиистэрэ, көхтөөх дьоммут кээпэрээссийэни ылсан дьарыктаныахтара, - диэн эттэ норуот дьокутаата Андрей Находкин.

Сенатор кээпэрээссийэни сайыннарыыга дьайыылаах кэккэ сытыы проблемаларга болҕомтотун уурда. Кинилэр ортолоругар бөдөҥ атыы-эргиэн, агрофирмалары уонна холдиҥнары, бөдөҥ оҥорон таһаарар тэрилтэлэри, ырыынак бэрэстэбиитэллэрин кытары, тыа хаһаайыстыбатын бородууксуйатын харайар, аттарар сөптөөх инфраструктура суоҕун, уо.д.а. эттэ.

Парламентарий тыа хаһаайыстыбатын кээпэрэтииптэрин тэрийиигэ, кэккэ уустуктар баалларын, ол иһигэр бастакы тэрийиитигэр үп-харчы көстүбэтин, тыа хаһаайыстыбатын тиэхиньикэтигэр сыана үрдүгүн, тыа сиригэр бородууксуйаны оҥорооччулар бэйэ-бэйэлэрин кытта сибээстэспэттэрин уонна билигин баар тыа хаһаайыстыбатын кээпэрэтииптэрин түмэр холбоһуктаах киин суоҕун ыйда.

- Итинтэн тыа хаһаайыстыбатын салаатыгар оҥорон таһаарыы уонна тыа сирин олохтоохторун олоҕун таһымын үрдэтии тэтимэ быһаччы тутулуктанар, – диэн сенатор кээпэрээссийэни сайыннарыы олус суолталааҕын чопчулаата.

Мунньахха дойду сенатордара Татьяна Гигель, Ольга Епифанова, Виталий Назаренко, Александр Наролин, Геннадий Орденов, Павел Тараканов, Геннадий Ягубов, туһааннаах министиэристибэлэр уонна биэдэмистибэлэр, дойду субъектарын былааһын уорганнарын, үп-харчы структураларын, научнай уонна үөрэх тэрилтэлэрин, салааларын бэрэстэбиитэллэрэ кытыннылар.