– Бэрэсидьиэн Владимир Путин Федеральнай Мунньахха Туһаайан этиитигэр Арассыыйа судаарыстыбатын кэлэр алта сылга сайдыытын стратегиятыгар бэйэтин көрүүлэрин иһитиннэрдэ. Онуоха тыа сирин, тыа хаһаайыстыбатын тумнубата. Арассыыйа араас тургутуулары эрдээхтик ааста, кинини баттыыр-самнарар күүс суоҕун бүтүн аан дойду өссө төгүл көрдө, дойдубут экэниэмиэкэтэ биэс бастыҥ кэккэтигэр киирдэ, аһынан-үөлүнэн бэйэбитин толору хааччынарбыт таһынан, бурдук аан дойдутааҕы ырыынагар лидер буоллубут диэтэ. Эһиги сыралаах үлэҕит түмүгэр бу кирбии ситиһилиннэ диэн тыа хаһаайыстыбатын бары үлэһиттэригэр, дьоҕус урбаан бэрэстэбиитэллэригэр, атыннык эттэххэ, пиэрмэрдэргэ уонна исписэлиистэргэ махталын биллэрдэ. 2030 сылга агропромышленнай комплекс баалабайынан оҥорон таһаарыытын кээмэйэ 2021 сыллаах көрдөрүүгэ тэҥнээтэххэ, 25 %-ынан улаатыахтаах, бородууксуйаны экспортка таһаарыы 1,5 төгүл үрдүөхтээх диэтэ. Онон АПК-ны өйөөһүн салгыы ыытыллар, тыа сирин территорияларын кэлим сайыннарыы бырагырааматынан үлэ салҕанар, «ийэ хапытаалын» уонна дьиэ кэргэн чэпчэтиилээх ипотекатын болдьохторо уһатыллар, нолуоктарга тустаах чэпчэтиилэр киирэр буолбуттарын үөрэ иһиттибит.
Олоххо киллэриллиэхтээх биэс саҥа национальнай бырайыак тыа сиригэр, тыа хаһаайыстыбыгар эмиэ сыһыаннаахтар. Ол курдук «Дьиэ кэргэн» национальнай бырайыак тыа сирин ыалларыгар, чуолаан элбэх оҕолоохторго төһүү буолуоҕа; «Каадырдар» национальнай бырайыак чэрчитинэн ыччаты тыа сиригэр, тыа хаһаайыстыбатыгар саамай ирдэнэр оробуочай идэлэргэ уһуйар орто анал үөрэх тэрилтэлэрин материальнай-тиэхиньиичэскэй базалара сөргүтүллүө, саҥардыллыа, үлэлэрэ-хамнастара тэтимириэ, көдьүүстэрэ үрдүө.
– Каадыр тиийбэтэ, тиэхиньикэ туһаныллыбата, саҥа технология киллэриллибэтэ ханнык баҕарар салаа сайдыытын атахтыыр, ол иһин бу саҥа национальнай бырайыак оҥоһулунна, – диэтэ Бэрэсидьиэн.
Онон хамсааһыны таһаарар дьаһаллар ылыллаллара күүтүллэр, үлэбитин-хамнаспытын онно сөп түбэһиннэрэн, онно тирэнэн тэрийэрбит ирдэнэр.
-
0
-
0
-
0
-
0
-
0
-
0
