Бастакынан ытык кырдьаҕастар, үөрэҕирии, култуура, доруобуйа харыстабылын эйгэтин үлэһиттэрэ, элбэх оҕолоох ийэлэр, тыа хаhаайыстыбатын үлэhиттэрэ, эдэр ыччаттар куоластаан, гражданскай көхтөрө үрдүк таhымнааҕын көрдөрдүлэр.
Бүгүн, быыбар үhүс, түмүктэнэр күнүгэр, бары быыбардыыр учаастактар сарсыарда лоп курдук 8 чааска аһыллыбыттара. Бары нэhилиэктэр быыбардыыр хамыыhыйаларын үлэһиттэрэ быыбардааччыларын сахалыы таҥастаах үөрэ-көтө көрсөн, биир дойдулаахтарын махталын ыллылар.
Дьааҥы куоратын олохтооҕо, Дьоруой Ийэ, 77 саастаах Вера Ариановна Чукрова быыбарга мэлдьи көхтөөхтүк кыттар, быйыл даҕаны биир бастакынан куоластаан ыччаттарга холобур буолла.
Бу күннэргэ 18 сааһын туолбут 11 кылаас үэрэнээччилэрэ Арассыыйа Бэрэсидьиэнин быыбарыгар кыттар быраабы ыллылар. Дьоhун саастарын туолбут күннэринэн уонна улахан тэрээhиҥнэ кыттыбыттарынан эҕэрдэ тыллар ананнылар – Дьааҥы куоратыттан Ренат Гуляевка, Аксинья Охлопковаҕа, Айсена Гороховаҕа, Дулҕалаахтан Михаил Старостиҥҥа, Сайдыыттан Эркин Старостиҥҥа, Табалаахтан Иванна Слепцоваҕа, Элгэстэн Арсентий Стручковка.
– 18 сааспын туолаат, дойду Бэрэсидьиэнин быыбарыгар кыттарым миэхэ олус долгутулаах умнуллубат түгэн. Быыбардыыр учаастак бырааhынньыктыы киэргэммит анал хоhугар төрөөбүт Дулҕалааҕым, Дьааҥым, Сахам Cирэ өссө сайдарын туhугар бэйэм куоласпын биэрдим, -- диэн саҥа быыбардааччы бэйэтин санаатын үллэстэр.
Дьааҥы сиригэр аны биир чааhы кыайбатынан бары быыбардыыр учаастактар сабыллан, үс күннээх быыбар түмүгэ сарсын биирдэ биллиэҕэ.
-
7
-
0
-
0
-
0
-
0
-
0
