Судаарыстыбаннай Дуума дьокутааттарын, Саха Өрөспүүбүлүкэтин Бырабыыталыстыбатын, Атыы-эргиэн бырамыысыланнай балаататын, урбаанньыттары ыҥыран, дьоҕус уонна орто урбаан кыһалҕаларын Өрөспүүбүлүкэтээҕи Медиа-кииҥҥэ төгүрүк остуолга дьүүллэспиттэрэ.
Фракция чилиэннэрэ тыа сиригэр уонна Аартыкаҕа пропискалаах дьоҕус урбаан бэрэстэбиитэллэрэ уоппускаларыгар сынньана барар айаннарын ороскуотун 2 сылга биирдэ төлүүр туһунан Арассыыйа сокуонугар көннөрүүнү киллэрэргэ туруорсубуттара. Судаарыстыбаннай Дуума дьокутаата, «Саҥа дьон» бэлитиичэскэй баартыйа фракциятын чилиэнэ Георгий Арапов Дьокуускайга кэлэ сылдьан, ХИФУ устудьуоннарыгар тулалыыр эйгэни харыстыырга судаарыстыба оруолун туһунан лиэксийэ аахпыта.
Сардаана Авксентьева улуус мунньаҕын дьокутааттарын кытта төгүрүк остуолга мустан, бииргэ үлэлэһэр туһунан сөбүлэһиини түһэрсибиттэрэ.
Дьиэ кэргэн сылыгар «Саҥа дьон» бэлитиичэскэй баартыйа эрэгийиэннээҕи салаата элбэх оҕолоох ыаллары өйүүргэ, кинилэргэ көмө оҥорорго аахсыйа тэрийэн ыыппыта.
Ньургуйаана Заморщикова Дьокуускайга Аппа уҥуор быыбардыыр уокурукка, Пригороднай, Эргэ Табаҕа, Төхтүр, Өктөм бөһүөлэккэ олорор тыыл бэтэрээннэрин, сэрии оҕолорун эҕэрдэлээбитэ. Халаан уута кэлбитигэр ыксаллаах кэмҥэ Нам улууһун Хомустаах нэһилиэгин олохтоохторугар көмө оҥорбуттара.
2024 с. аан бастаан Тумаада ыһыаҕар «Саҥа дьон» баартыйа чилиэннэрэ, өйөөччүлэрэ бииргэ түмсэн, ыһыахтаабыттара. Онтон сэтинньигэ фракция чилиэнин, Ил Түмэн урбааҥҥа уонна туризмҥа сис кэмитиэтин бэрэссэдээтэлэ Алексей Корниловы кытта Аллайыаха улууһун Чокурдаах бөһүөлэгэр тиийэн, олохтоох салалтаны, нэһилиэнньэни, урбаанньыттары кытта көрсүбүттэрэ.
Фракция чилиэннэрэ Ленскэй, Мииринэй, Өлүөхүмэ, Аллайыаха улууһун дьокутааттарын, олохтоохторун кытта миэстэтигэр көрсөн, ким туох кыһалҕалааҕын билистилэр, олохтоох оҥорон таһаарааччылары өйөөһүн боппуруостарын дьүүллэстилэр.
2024 с. иһигэр «Саҥа дьон» баартыйа дьокутааттарыгар биирдиилээн дьонтон 50 тахса араас кыһалҕалаах суруктар киирдилэр, ол барыта сокуонунан көрүллүбүт болдьоххо көрүллэн, салгыы хонтуруолга ылылынна.
Үгэс быһыытынан, улуус олохтоохторо, уопсастыбаннай түмсүүлэр араас аһымал аахсыйаҕа кыттарга ыҥыраллар, кыһалҕалаах кэмҥэ үбүнэн-харчынан көмө көрдөөн суруйаллар. Фракция чилиэннэрэ ким төһө кыахтааҕынан дьоҥҥо өрүү көмөлөһөллөр. Ааспыт сылга 400 тыһ. солк. тахса суумалаах спонсорскай көмө оҥоһулунна.
Хаартыска: "Саҥа дьон" баартыйа архыыбыттан.
-
0
-
0
-
0
-
0
-
0
-
0
