Антонина Афанасьевна быһааран биэрбитинэн, норуот дьокутааттара элбэх кыбартыыралаах дьиэлэргэ уонна чугастааҕы эргин итирдэр утаҕы атыылыыр сирдэри хааччахтыырга, үөрэх эйгэтигэр тус сыаллаах үөрэтиигэ, сир кодексатыгар уларытыылары киллэрэргэ, доруобуйа харыстабылыгар тустаах сокуону ылынары көҕүлээтилэр.
Урут тус сыаллаах үөрэтии хайысхатынан үрдүк үөрэххэ киирбит устудьуон дуогабар быһыытынан, сыһыарыллыбыт тэрилтэтигэр 5 сылтан итэҕэһэ суох үлэлиэхтээх этэ. Онтон билигин үлэни биэрээччи быһаарыытынан, ити болдьох 3-5 сыл иһинэн буолуохтаах. Сорох түгэҥҥэ үөрэҕин бүтэрбит эдэр выпускник дуогабардаспыт тэрилтэтигэр тиийдэҕинэ, миэстэ суох диэн үлэҕэ ылбаттар. Оччотугар бу тэрилтэ үлэнэн хааччыйбатаҕына, хамнаһын акылаатын төлүөхтээх. Онон үөрэҕин бүтэрэн саҥа үлэлии барар эдэр киһи интэриэһин сокуон көмүскүүр.
Анал байыаннай дьайыы буола турар кэмигэр үүнэр көлүөнэни Аҕа дойдуга бэриниилээх буолууга иитии судаарыстыба биир сүрүн соруга. Ол иһин бу хайысханан ылыныллыбыт сокуон ыччаты патриотическай тыыҥҥа иитиигэ хас биирдии муниципалитет уонна өрөспүүбүлүкэ таһымыгар киэҥник туттуллуохтаах. Ыччат олоххо, үлэҕэ, дойдутун сайыннарарга уонна көмүскүүргэ бэлэм буолуохтаах, итиниэхэ тустаах сокуон тирэх буолар.
Аны медвытрезвителлар сабыллыахтарыттан итирик киһи кыһын тымныыга таһырдьа тахсан охтон хаалан, өйүн сүтэриэр диэри иһэн, устунан үлүйэн, олохтон соһумардык туораабыт түбэлтэлэрэ тахсаллар. Ол иһин сокуон күүһүнэн медвытрезвителлэри сөргүтэн, мэдиссиинискэй көмө оҥоһулларын ситиһиэхтэрин баҕараллар.
Антонина Григорьева 2024 с. биирдиилээн дьону кытта көрсүһүү кыраапык быһыытынан, Губинскай уокурукка, итиэннэ «Биир Ньыгыл Арассыыйа» эрэгийиэннээҕи уопсастыбаннай приемнайыгар ыытыллыбытын туһунан эттэ. Уокурук олохтоохторо тиэргэни, уопсастыбаннай эйгэни тупсарыыга этиилэрин киллэрэллэр, ким эрэ оҕотун уһуйааҥҥа биэрээри миэстэ ыйыталаһар.
-
0
-
0
-
0
-
0
-
0
-
1
