Ньурба улууһун дьокутааттарын сэбиэтин бэрэссэдээтэлэ Ньургуйаана Михайлова хайдах дьокутаат буолбутун туһунан кэпсээтэ уонна олохтоох бэйэни салайыныыга киирэр саҥа сокуон тула санаатын үллэһиннэ.
— 2000 сылларга аан бастаан эдэр сылдьан дьокутаакка турарбар муниципальнай тэриллиилэр саҥа тэриллэр кэмнэрэ этэ, уларыта тутуу кэнниттэн олохпут уларыйан, көнөн эрэр сэргэх тыына биллибитэ. Биһиги көлүөнэ оҕолор үөрэхпитин бүтэрэн, ыал буолан, оҕо төрөтөн, үлэлиир күүспүт үгэнигэр сылдьар курдук сананарбыт. Хас уокурук аайы эдэр ыччат мустан, түмсүү тэрийбиппит, үксүбүт дьокутаат буолбуттара, кэлин кэм-кэрдии ааһан, араас сирдэринэн-дойдуларынан тарҕаспыппыт, билигин кинилэр экэниэмикэ араас салаатыгар, урбааҥҥа үлэлии-хамсыы сылдьаллар.
Дьокутаакка киирбит сүрүн төрүөтүм төрөөбүт дойдубар, тапталлаах Ньурбабар туһалааҕы оҥоруохпун баҕарбытым. Оччолорго Ньурба куорат баһылыга Галина Поликарпова этэ, кинилиин бэркэ тапсан үлэлээбиппит. Үп-харчы бүддьүөккэ кырыымчык соҕус кэмнэрин ааспыппыт, ол да буоллар, Бүлүү өрүс кытылын тупсаран оҥоруохпутун, болуоссаттары, искибиэрдэри тутуохпутун, суоллары аспааллыахпытын, уулуссалары сырдатыахпытын баҕарарбыт.
Сыыйа-баайа олохпут сайдан, ол бырайыактар үлэҕэ киирэн эрэллэриттэн киһи үөрэр. Билигин федеральнай, өрөспүүбүлүкэ таһымыгар араас күрэхтэр ыытыллаллар, үбүлээһин баар буолла. Онон биһиги идиэйэлэрбитин олоххо киллэрэр кыахтанныбыт.
Билигин бэйэни салайыныы реформата киириэхтээх, публичнай былаас биир ситимигэр бэйэни салайыныы уопсай бириинсиптэрин тэрийии туһунан сокуону ырытыспыппыт ыраатта. Дойду үрдүнэн улахан уларыйыы буолуохтаах, эрэгийиэннээҕи былаас биир таһымнаах бэйэни салайыныыга эбэтэр уруккутун курдук икки таһымнаахха хаалыахтаах. Ону эрэгийиэннээҕи былааска бэйэтэ быһаарар кыаҕы биэрдилэр. Тыһыынчанан уларытыы, этии киирбитин ылынан, бэйэбит талар кыахпытын хааллардылар.
Ил Түмэн олохтоох салайыныыга сис кэмитиэтин бэрэссэдээтэлэ Владимир Прокопьев Ньурбаттан бэйэбит дьокутааппыт, бу боппуруоһу дьүүллэспиппит ыраатта. Ону таһынан, райсэбиэт бэрэссэдээтэллэрэ эмиэ сүбэлэһэбит, ырытаһабыт.
Олохтоох дьокутааттар, Ил Дархан Айсен Николаев икки таһымнаах былаас хаалара ордук табыгастаах диэн эппиттэрэ.
Олохтоох салайыныы күнүгэр Ньурбаҕа тэрийэр кэмитиэт оҕолорго, ыччаттарга, нэһилиэнньэҕэ бу күн суолтатын, ис хоһоонун тиэрдэргэ декаданы саҕалаата. Оскуола улахан кылааһын оҕолоро улуус дьаһалтатыгар, райсэбиэккэ кэлэн үлэни-хамнаһы билсиэхтэрэ уонна да атын сонун тэрээһиннэр былааннаналлар.
Дьокутааттар уопсастыбаннай ноҕурууска быһыытынан хамнаһа суох үлэлииллэр, ол иһин кэлиҥҥи кэмҥэ дьон манна аһара таласпат буолла.
Түгэнинэн туһанан, олохтоох салайыныыга үлэлии сылдьар дьоммутун, бэтэрээннэрбитин идэлээх күммүтүнэн эҕэрдэлиибин! Дьон олоҕо тупсарыгар туһуланар үлэҕит өрүү ситиһиилээх буоллун, этэҥҥэ чэгиэн-чэбдик сылдьыҥ!
Василий Кононов хаартыскаҕа түһэриитэ.
-
1
-
0
-
0
-
0
-
0
-
0
