Ил Түмэн бэрэссэдээтэлэ Алексей Еремеев ытык-мааны ыалдьыттарга өрөспүүбүлүкэ парламенын үлэтин туһунан кэпсээтэ. 70-ча норуот дьокутаата нэһилиэнньэ олоҕун таһымын тупсарарга үлэлииллэрин туһунан иһитиннэрдэ, сис кэмитиэт бэрэссэдээтэллэрин билиһиннэрдэ.
Саха Сиригэр 35 быыбардыыр уокурук баарын, 35 дьокутаат биир мандааттаах уокуруктан, итиэннэ баартыйа испииһэгинэн татыллалларын бэлиэтээтэ. 70-ча дьокутааттан 55-һэ “Биир Ньыгыл Арассыыйалар”, 6 дьокутаат «Саҥа дьон» баартыйаттан, 4 дьокутаат КПРФ-тан, 3 дьокутаат «Сиэрдээх Арассыыйа – Кырдьык иһин» уонна 1 дьокутаат ЛДПР-тан киирбиттэрин санатта.
Федеральнай сокуон барылын дьүүллэһэргэ Татарстан өрөспүүбүлүкэтин кытта 17 көҕүлээһин оҥоһуллубут, онтон 9-һа ылыныллыбыт. Ону таһынан, федеральнай сокуон барылыгар икки өрөспүүбүлүкэ кыттыһан туран 86 көннөрүүнү киллэрбиттэр. Онон түүр төрүттээх өрөспүүбүлүкэлэр сокуону ылыныыга сүбэлэрин холбоон үлэлииллэр.
Оттон Крым өрөспүүбүлүкэтин кытта 2024 с. бииргэ үлэлэһэр туһунан сөбүлэһии түһэрсибиттэрэ. Судаарыстыбаннай Дуума ыччат бэлиитикэтин кэмитиэтэ бу саас Дьокуускайга кэлэ сырыттаҕына Саха Өрөспүүбүлүкэтэ, Крым уонна Донецкай норуодунай өрөспүүбүлүкэ көҕүлээһиннэринэн Аҕа дойдуга бэриниилээх буолууну көҕүлүүр федеральнай сокуон кэнсиэпсийэтин киллэрбиттэрин дьүүллэспиттэрэ.
Андрей Козырев, Крым Өрөспүүбүлүкэтин Судаарыстыбаннай Сүбэтин бэрэссэдээтэлин бастакы солбуйааччыта парламент дэлэгээссийэтэ Ил Түмэҥҥэ сокуону чочуйарга уопут атастаһа, экэниэмикэ салаатыгар бииргэ үлэлэһэргэ сыаллаах-соруктаах кэлбитин туһунан эттэ.
Кини Арассыыйа биир саамай ыраах уонна улахан эрэгийиэнигэр, Саха Сиригэр, ирбэт тоҥ үрдүгэр тутуллубут куоракка аан бастаан кэлбитин, өссө уһук хоту Аартыка хонноҕор сылдьыан баҕарарын биллэрдэ. Андрей Владимирович ыалдьытымсах Крымҥа икки муора Хара уонна Азовскай, хайа, истиэп барыта баарын этэн туран, сынньана кэлэргэ ыҥырда.
Альберт Хабибуллин, Татарстан өрөспүүбүлүкэтин Судаарыстыбаннай Сүбэтин судаарыстыбаннай тутууга уонна олохтоох салайыныыга кэмитиэт бэрэссэдээтэлэ 2012 с. Саха Сирин уонна Татарстан парламенын икки ардыгар түһэрсиллибит сөбүлэһии чэрчитинэн дэлэгээссийэ кэлбитин иһитиннэрдэ. Парламент уонтан тахса сыл тухары тиһигин быспакка Татарстаҥҥа, эбэтэр Саха Сиригэр көрсүһүү ыытарын, ол түмүгүнэн көдьүүстээх үлэ ыытылларын бэлиэтээтэ.
«Маннык көрсүһүүлэргэ сылдьан федеральнай кииҥҥэ сокуону ылыныыга биһиги араас боппуруоска биир көрүүлээх буолабыт. Биһиги кыттыгас көҕүлээһиннэрбит федеральнай сокуоннарга киирэн тураллар. Бу хайысханан үлэ салҕанар, норуоттар доҕордоһуулара күүһүрэр. Дэлэгээссийэ быһыытынан Үрүҥ Тунах ыһыахха кэллибит, оттон аҕыйах хонуктааҕыта Дьокуускайга Сабантуй ыытыллыбыта, онно Татарстан баһылыга Рустам Минниханов кыттыбыта», — диэн Альберт Галимзянович санаатын үллэһиннэ.
Ил Түмэн бэрэссэдээтэлэ Алексей Еремеев иһитиннэрбитинэн, олохтоох бэйэни салайыныы сокуонун ылынарга Татарстан өрөспүүбүлүкэтин дэлэгээссийэтин кытта уопут атастаһыахтаахтар, араас боппуруостары дьүүллэһиэхтээхтэр.
Кини Крым өрөспүүбүлүкэтин кытта былырыын бииргэ үлэлииргэ сөбүлэһии баттаһан, доҕордоһуохтарын баҕаралларын туһунан эттэ. Сэбиэскэй Сойуус саҕаттан Хара муора кытылыгар турар тумул арыыга дьон доруобуйатын чэбдигирдэр санаторийдар элбэхтэр, аатырбыт «Артек» оҕо лааҕыра эмиэ манна баар. Онон Сахабыт Сирин олохтоохторо Крымҥа тиийэн сынньаналларыгар суол аһыллан, киэҥ далааһыннаах далаһа ууруллуо.
Салгыытын «Ил Түмэн» хаһыат кэлэр нүөмэригэр ааҕыҥ.
Василий Кононов хаартыскаҕа түһэриитэ.
-
2
-
0
-
0
-
0
-
0
-
0
