Атырдьах ыйын 13 күнүгэр олохтоох салайыныы уорганнарыгар ыытыллар быыбарга кыттар хандьыдааттары эрэгистирээссийэлээһин түмүктэннэ. Ол туһунан Саха Сирин Киин быыбардыыр хамыыһыйата бэйэтин тэлэгэрээм-ханаалыгар иһитиннэрэр. Санатан эттэххэ, быйыл быыбар балаҕан ыйын 14 күнүгэр ыытыллыаҕа.
Түөрт улууска улуус дьаһалтатын баһылыктара талыллыахтара. Ол курдук, Өлөөн эбэҥки национальнай улууһун баһылыгар түөрт хандьыдаат баар, онтон үһэ «Биир ньыгыл Арассыыйа» баартыйаттан киирдилэр, биир киһи бэйэтин туруорунна.
Сунтаар улууһун баһылыгын быыбарыгар үс хандьыдаат баар, онтон биирдии киһи «Биир ньыгыл Арассыыйа», «Саҥа дьон» баартыйаттан киирдилэр уонна үһүс киһи бэйэтин туруорунна.
Уус Алдан улууһун баһылыгын быыбарыгар сэттэ хандьыдаат эрэгистирээссийэлэннэ, биир киһи «Саҥа дьон» баартыйаттан, алта киһи бэйэ туруорунуутунан.
Хаҥалас улууһун баһылыгын быыбарыгар алта хандьыдаат эрэгистирээссийэлэннэ, онтон биирэ «Биир Ньыгыл Арассыыйа», атыттар «Сиэрдээх Арассыыйа – кырдьык туһугар Арассыыйа патриоттара», «Арассыыйа хомуньуустара», «ЛДПР», «Аҕа дойду» баартыйа чилиэннэрэ.
Аҕытаассыйалыыр хампаанньа саҕаланна, сонуннары киэҥ эйгэҕэ тарҕатар ситимтэн, урбаанньыттартан кимнээх хандьыдааттары аҕытаассыйалыыр матырыйааллары таһаарар бырааптаахтарын туһунан муниципальнай быыбар быыбардыыр хамыыһыйатыгар билиэххэ сөп.
Атырдьах ыйын 16 күнүттэн тэлэбиидэнньэҕэ, араадьыйаҕа, хаһыакка, куйаар ситимигэр хандьыдааттары аҕытаассыйалыыр көҥүллэннэ. Быыбар иннинээҕи аҕытаассыйалыыр хампаанньа балаҕан ыйын 13 күнүгэр 0:00 чааска түмүктэниэҕэ.
Хаартыска СӨ Киин быыбардыыр хамыыһыйатын Тэлэгэрээм-ханаалыттан.
-
0
-
0
-
0
-
0
-
0
-
0
