Бу күн саха саргытын салайсыбыт судаарыстыбаннай диэйэтэллэргэ сүгүрүйэллэр, 1990 с. өрөспүүбүлүкэбит Үрдүкү Сэбиэтин Бэрэссэдээтэлэ Михаил Николаев дьокутааттары түмэн, суверенитеты ылыныыга сүҥкэн улахан оруоллааҕын бэлиэтиирбит тоҕоостоох.
СӨ Бырабыыталыстыбатын бэрэссэдээтэлэ Кирилл Бычков өрөспүүбүлүкэ социальнай-экэнэмиичэскэй сайдыытын олугун уурбут Бастакы Бэрэсидьиэммит Михаил Ефимович уустук кэмҥэ, Сэбиэскэй Сойуус ыһыллар кэмигэр өрөспүүбүлүкэни салайбытын, устуоруйа саҥа кэрдиис кэмин саҕалаабытын, экэниэмикэ сайдар суолун тэлбитин туһунан эттэ.
Ил Түмэн Бэрэссэдээтэлин солбуйааччы, байыаннай сулууспалаахтар, байыаннай дьайыы бэтэрээннэрин, Аҕа дойдуга бэриниилээх буолууга, уопсастыбаннай түмсүүлэргэ сис кэмитиэт бэрэссэдээтэлэ Александр Подголов лоп курдук 35 сыл анараа өттүгэр ылыныллыбыт суверенитет күн сирин көрөрүгэр Михаил Николаев дьоһун кылаатын киллэрбитин бэлиэтээтэ.
Соторутааҕыта эрэ талыллыбыт Хаҥалас улууһун баһылыга Сергей Гребнев Бастакы Бэрэсидьиэммит биир дойдулаахтара, хаҥаластар, суверенитет туһунан декларацияҕа Михаил Ефимович илии баттаспытынан киэн тутталларын биллэрдэ. Кини бүгүн судаарыстыбаннай уонна бэлитиичэскэй диэйэтэллэр, бырааттыы Гавриил уонна Павел Ксенофонтовтар пааматынньыктарыгар, СӨ Норуотун хаһаайыстыбатын үтүөлээх үлэһитин, Хаҥалас улууһун Бочуоттаах олохтооҕун Зоя Решетникова бюһугар сибэкки уурбуттарын туһунан иһитиннэрдэ.
Хаҥалас улууһун дьокутааттарын сэбиэтин бэрэссэдээтэлэ Анатолий Антонов 1990 с. өрөспүүбүлүкэбит Үрдүкү Сэбиэтин Бэрэссэдээтэлэ Михаил Николаев суверенитет туһунан декларацияҕа илии баттаспыта күн бүгүн дойдубутун сайдар суолга бигэтик үктэннэрбитин бэлиэтээтэ.
Онон төрөөбүт дойдуга истиҥ таптал хас биирдии киһи сүрэҕэр баарын тухары барҕа быйаҥнаах Сахабыт Сирэ, модун Арассыыйа киэн туттуута үүнэ-сайда туруоҕа.
Ааптар хаартыскаҕа түһэриитэ.
-
1
-
0
-
0
-
0
-
0
-
0
