Бастатан туран, Ньурба улууһун 56 №-дээх суут учаастагын мировой судьуйатын солотугар үс сылга болдьохтоон Татьяна Вешникованы, Өлүөхүмэ улууһун 57 №-дээх суут учаастагар эмиэ итинник болдьоххо Ольга Мельникованы таллылар.
Саха Өрөспүүбүлүкэтигэр олохтоох салайыныы туһунан 305-7 №-дээх өрөспүүбүлүкэ сокуонун барылын иккис ааҕыыга ылынарга дьокутааттар киллэрбит көннөрүүлэрин ылынарга 21 пууннаах, ону таһынан 27 пууннаах көннөрүүлэри утарыыны көрдүлэр.
Норуот дьокутааттара Федот Филиппов, Никита Тимофеев, Алексей Корнилов, Ньургуйаана Заморщикова, Владимир Поскачин, Ренат Хусаинов, Егор Григорьев киллэрбит көннөрүүлэригэр муниципальнай тэриллиилэр баһылыгы хайдах талалларын бэйэлэрэ быһааралларын туһунан этиллэр. Ону таһынан, итиннэ кистэлэҥ куоластааһын, сокуон барылын преамбулатын саҥа эрэдээксийэ быһыытынан суруйуу, нэһилиэнньэни хааччыйыы боппуруостара, олохтоох салайыныы уорганын боломуочуйатын чуолкайдааһын киирэр. Итиэннэ куорат уокуругун баһылыгар киирбит кандидатуралары эрдэттэн көрүүгэ, судаарыстыбаннай былаас боломуочуйатын кэҥэтиигэ сыһыаннаах.
Ил Түмэн олохтоох салайыныыга сис кэмитиэтин бэрэссэдээтэлэ Владимир Прокопьев хас биирдии көннөрүү, эбэтэр көннөрүүнү утарыы ис хоһоонун быһааран биэрдэ уонна ол туһунан сис кэмитиэт санаатын иһитиннэрдэ. Кини этэринэн, үгүс көннөрүүлэр бэйэ-бэйэлэрин кытта хардарсаллар, сорох көннөрүү 33 №-дээх федеральнай сокуону кытта сөпсөспөт эбит, бу сокуон муниципальнай тэриллии баһылыгын боломуочуйатын хас даҕаны альтернативнай ньыматын хааччыйар, ону муниципальнай тэриллии субъегын сокуона быһаарар.
Куоластааһын көрүҥүн туһунан көннөрүүнү сис кэмитиэт сокуон барылыгар киллэрэр кыаҕа суох, бу боппуруос эрэгийиэн сокуонунан быһаарыллыбат. Ону муниципалитеттар устааптара, эбэтэр кистэлэҥ куоластааһын туһунан балаһыанньа чопчулуохтаах.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
