«Бу сокуону ылынарга улахан үлэ ыытылынна, 100-тэн тахса этии, 50-ча көннөрүү киирбитэ, онон оройуоннааҕы сэбиэт, норуот дьокутааттарыгар, судаарыстыбаннай, муниципальнай быраап бастыҥ юристарыгар, эспиэртэргэ махталбын биллэрэбин. Боломуочуйа өттүгэр элбэх этии киирдэ, оттон сокуон 2027 сыл тохсунньу 1 күнүттэн олоххо киирэринэн сибээстээн, 2026 сылга бу боппуруоска өссө төннүөхпүт», — диэтэ тустаах сис кэмитиэт бэрэссэдээтэлэ Владимир Прокопьев.
Ил Түмэн спикерэ Алексей Еремеев: «Өрөспүүбүлүкэ инники сайдыытын сирдиир биир сүрүн тирэх буолар сокуону ылынныбыт. Сокуон 2026 сылга киириэ эрээри, боломуочуйа өттүгэр толору күүһүн 2027 сыл тохсунньу 1 күнүттэн ылыахтаах. Сис кэмитиэттэри уонна бырабыыталыстыбаны кытта кэлэр сыл бастакы аҥаарыгар Арассыыйа субъегын, өрөспүүбүлүкэ боломуочуйатын чааһыгар улахан сокуону ылыныахпыт, ону муниципальнай таһымҥа тиэрдиэхпит. Муниципалитеттар 33 №-дээх федеральнай сокуоҥҥа, бу саҥа ылыныллыбыт сокуоҥҥа олоҕуран, бэйэлэрин таһымнарыгар тустаах быраап аакталарын ылыныахтаахтар, ону таһынан устааптарын итиниэхэ сөп түбэһиннэрэн биэриэхтээхтэр», — диэн чуолкайдаата.
Куоластааһын түмүгүн сырдаттахха, сокуон барылын 43 норуот дьокутаата өйөөтө, уон дьокутаат утарда, икки туттунна. Онон олохтоох салайыныы туһунан өрөспүүбүлүкэ сокуонун иккис бүтэһик ааҕыыга ылынан, Саха Сиригэр икки таһымнаах олохтоох салайыныы хаалла.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
