Төгүрүк остуолга административнай быраабы кэһии туһунан эрэгийиэннээҕи кодексаҕа киирбит уларыйыылары, боротокуол толоруутун дьүүллэстилэр. Улуустар административнай хамыыһыйаларын статистикатын көрдүлэр.
СӨ Юстициятын судаарыстыбаннай кэмитиэтин бэрэссэдээтэлэ Павел Иванов ааспыт сыл түмүгүнэн быраабы кэһии статистикатын билиһиннэрдэ. Уопсайа 2903 боротокуол толоруллубут, онно олоҕуран, административнай быраабы кэһиигэ уураах тахсыбыт. Эппиэтинэскэ 2356 киһини тардыбыттар, 4199 түбэлтэҕэ матырыйааллары чинчийэн көрбүттэр, онтон 2470 дьыалаҕа ыстараап оҥоһуллубут, 1363 сэрэтиини биэрбиттэр.
Дьокуускай куорат административнай хамыыһыйатын бэрэссэдээтэлэ Сардаана Васильева кодексаны тупсарарга кэккэ этиилэрин киллэрдэ, оччотугар административнай хамыыһыйалар үлэлэрин көдьүүһэ көстүөн сөбүн уонна нэһилиэнньэ олоҕо тупсарын бэлиэтээтэ.
Кини таһырдьа ыытыллар атыы-эргиэн, нэһилиэнньэҕэ өҥөнү оҥоруу бэрээдэгин кэһии туһунан ыстатыйаны төнүннэрэргэ, ону таһынан, ынаҕы-сүөһүнү, сылгыны мэччирэҥҥэ ыытыы бэрээдэгин олохтуурга ыҥырда. Итиэннэ төлөбүрдээх муниципальнай парковканы туһаныы быраабылатын кэһии тахсар түгэнигэр эппиэтинэскэ тардар наадалааҕын ыйда. Сайыҥҥы кэмҥэ уулуссаҕа электросамокатынан сылдьарга быраабыла олохтонуохтааҕын бэлиэтээтэ.
Ил Түмэн урбааҥҥа уонна туризмҥа сис кэмитиэтин бэрэссэдээтэлэ Алексей Корнилов тустаах кодекса 6 төбөтүгэр сигэнэн, ыстараап кээмэйин уларытар кэм ирдэбилэ буолбутун туһунан иһитиннэрдэ. Билигин олохтоммут ыстараап кээмэйэ быраабы кэһии хоромньутун кыайан толуйбатын, атын эрэгийиэннэр быраактыкаларыгар сөп түбэспэтин санатта. Сири-уоту, тиэргэни тупсарарга боломуочуйаны тыырарга уонна өрөспүүбүлүкэ үрдүнэн биир быраабыланы олохтуурга этии киллэрдэ.
СӨ ветеринарияҕа управлениетын салайааччытын солбуйааччытын э.т. Анастасия Никитина дьиэ кыылын булгуччу регистрациялыыр туһунан сокуон тугу этэрин билиһиннэрдэ, нэһилиэнньэ ортотугар хамсыыр харамайга эппиэтинэстээх сыһыан баар буолуохтааҕын биллэрдэ. Кини бу хайысханан сокуоҥҥа туох уларыйыы киирбитин, дьон куттала суох буолуутун хааччыйарга туох үлэ оҥоһулларын кэпсээтэ.
Эрэгийиэннээҕи сокуону оҥоруу боппуруоһугар отдел начаалынньыга Кирилл Кривошапкин кодексаны саҥардарга, федеральнай сокуону кытта сөп түбэспэт өттүн көннөрөргө ыҥырда. Кодекса нуорматын чочуйуу бырайыагын оҥорорго биэдэмистибэлэр икки ардыларыгар үлэлиир оробуочай бөлөҕү тэрийэргэ этии киллэрдэ.
Сүрүн дакылааччыттары истэн баран норуот дьокутааттара быраабы туһаныыга, сокуоҥҥа туох-ханнык уларыйыы киириэн сөбүн туһунан ыйытыктары биэрдилэр.
Владимир Прокопьев административнай хамыыһыйаҕа ноҕорууска эбиллэрин учуоттаан, сокуону чочуйууга саҥа этиилэр киириэхтэрин сөбүн туһунан интэриэһиргээтэ. Андрей Находкин хамыыһыйаларга улахан ноҕорууска баарын бэлиэтээн туран, уулуссаҕа омук тылынан суруллубут вывескаларга болҕомто уурар уолдьаспытын эттэ.
Светлана Давыдова ыстараап хос оҥоһуллуона сөбүн туһунан туоһуласта. Алена Атласова административнай хамыыһыйа үлэтин ким хонтуруоллуурун, үлэ миэстэтин квоталааһын туһунан ыйыталаста.
Иван Луцкан быраҕыллыбыт оҕо былаһааккаларын дьылҕатын, боротокуол толорорго элбэх бириэмэ барарын, тиэргэни тупсарыы боппуруостарыгар көрүллэр ыстараап тоҕо кыччаабытын, онно туох төрүөт буолбутун сураста. Николай Кульбертинов кодекса 37 ыстатыйатыттан 22-тэ эрэ чахчы үлэлиирин ыйан туран, атын ыстатыйалар тоҕо көдьүүһэ суохтарын үөрэтэргэ, онуоха интэриэстээх уорганнары ыҥырарга эттэ. Маны таһынан, миэстэтигэр үлэлии сылдьар дьон ахсаанын элбэтэргэ, хамнастарын үрдэтэргэ эбии ороскуоту көрөргө этиитин киллэрдэ.
Ил Түмэн урбааҥҥа уонна туризмҥа сис кэмитиэтин бэрэссэдээтэлэ Алексей Корнилов административнай хамыыһыйа административнай юрисдикция уоргана, хонтуруоллуур уорган буолбатах диэн чуолкайдаата. Кини толоруллар боротокуол каачыстыбатын үрдэтэргэ, норуот дьокутааттара ирдэбиллэрин толорботохторуна өрөспүүбүлүкэ уорганын таһымыгар көрүллэр дьыаланы биэрэргэ эттэ.
Төгүрүк остуолга административнай хамыыһыйа уонна муниципальнай хонтуруол уорганнарын үлэтин хайысхатынан ким тугу оҥорорун араарарга, киирбит этиилэри мунньан, мунньах түмүгүнэн рекомендациялары ылынарга быһаарыннылар.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
