Юрий Михайлович ханнык саҥа сокуоннар ылыныллыбыттарын, туох уларыйыы киирбитин, ол дьон олоҕор хайдах дьайарын, бүддьүөппүт кээмэйин, куорат баһылыгын талыы бэрээдэгин туһунан саас-сааһынан кэпсээтэ.
Олохтоох салайыныыга улахан уларыйыы тахсан, дойду үрдүнэн саҥа сокуону ылыннылар, оттон эрэгийиэн бэйэтэ быһаарар кыаҕын хаалларан, өрөспүүбүлүкэҕэ уруккуттан баар икки таһымнаах олохтоох салайыныы оннунан хаалла. Онон өрөспүүбүлүкэҕэ 445 муниципальнай тэриллии, 34 улуус, 2 куорат уокуруга, 48 куорат, 361 тыа сирин нэһилиэктэрэ олохсуйбут бэрээдэгинэн хааллылар. Арай муниципальнай тэриллиилэр баһылыктарын быыбара уларыйда.
Федеральнай сокуон биир таһымнаах олохтоох салайыныыга ананан оҥоһуллубут, оттон Татарстан, Башкортостан көрдөһүүлэринэн национальнай өрөспүүбүлүкэлэргэ икки таһымнаах. Онон федеральнай уонна эрэгийиэн сокуонун дьүөрэлиир кэккэ уустуктардаах буолбут.
Өрөспүүбүлүкэ Ил Дарханын, Ил Түмэн дьокутааттарын нэһилиэнньэ быыбардыыр диэн оннунан хаалла, оттон былаас атын таһымнарыгар, Дьокуускай куорат баһылыгын талыыга кэккэ уларыйыылар киирдилэр. Киин куорат баһылыга Евгений Григорьев 2026 с. муус устар 2 күнүгэр болдьоҕун бүтэһик күнэ ааста, оттон федеральнай сокуон иитинэн кини быыбар буолуор диэри эбээһинэһин салгыы толорор. Дьокуускай баһылыгын быыбара Судаарыстыбаннай Дуума быыбарын кэнниттэн алтынньыга-сэтинньигэ буолуохтаах.
“Куорат дьокутааттарын нэһилиэнньэ талар, кинилэр киирбит хандьыдааттартан баһылыгы талыахтара. Дьокуускай баһылыгар хандьыдааты Ил Дархан, Судаарыстыбаннай Дуума, өрөспүүбүлүкэ парламенын баартыйалара, ВАРМСУ (олохтоох салайыныыны сайыннарарга бүтүн Арассыыйатааҕы түмсүү), Уопсастыбаннай балаата, Олохтоох салайыныыга өрөспүүбүлүкэтээҕи сэбиэт киллэриэхтэрэ.
Ил Дархаҥҥа куонкурус хамыыһыйата киирбит хандьыдааттары үөрэтиэҕэ, онтон Ил Дархан иккиттэн итэҕэһэ суох киһини талан ылан, Дьокуускайдааҕы куорат мунньаҕар киллэриэҕэ. Куорат дьокутааттара аһаҕас куоластааһын быһыытынан баһылыгы талыахтара. Дьокутааттары нэһилиэнньэ талар, оттон кинилэр куорат баһылыгын талаллар. Онон интэриэһинэй сыл күүтэр, саҥа сылга саҥа баһылыгы кытта үктэниэхпит”— диэтэ Ил Түмэн бэрэссэдээтэлин солбуйааччы Юрий Николаев.
Салгыытын "Ил Түмэн" хаһыакка ааҕыҥ.
Мичил Яковлев, ХИФУ хаартыскаҕа түһэриитэ.
-
0
-
0
-
0
-
0
-
0
-
0
