Ил Түмэн спикерэ Алексей Еремеев Москубаҕа бара сылдьан Судаарыстыбаннай Дуума судаарыстыбаннай тутууга уонна сокуону таһаарыыга сис кэмитиэтин бэрэссэдээтэлин Павел Крашенинниковы кытта көрсөн, публичнай былаас биир кэлим тиһигэр олохтоох салайыныыны тэрийии уопсай бириинсиптэрин туһунан федеральнай сокуон барылын дьүүллэспиттэрэ.
Ил Түмэн иккис ааҕыыга уларытыылары киллэрбитэ, онно судаарыстыбаннай былаас федеральнай уоргана муниципальнай тэриллиини, кини кыраныыссатын уларытыыны көҕүлүүр быраабын тохтоторго диэн этиллибитэ. Ону таһынан, Саха Сирин парламена куорат уокуругар, муниципальнай уокурукка олохтоох дьаһалта булгуччу тэриллиэхтээх диэн туруорсубута.
Былырыын ахсынньыга Ил Түмэн сүрүн тирэх буолар өрөспүүбүлүкэ сокуонун ылыммыта, онно Саха Сиригэр икки таһымнаах олохтоох салайыныы (нэһилиэк уонна оройуон таһымыгар) хаалар диэн этиллибитэ. Сокуону ылыныыны муниципальнай тэриллиилэри, уопсастыбаннаһы уонна нэһилиэнньэни кытта ырытыспыттара.
Спикер Алексей Еремеев салалталаах оробуочай бөлөх Амма, Чурапчы, Таатта, Үөһээ Дьааҥы, Эбээн Бытантай, Бүлүү, Үөһээ Бүлүү улуустарыгар тиийэн, баһылыктары, тыа хаһаайыстыбатын бородууксуйатын оҥорооччулары, бэрэстэбиитэллээх уорган дьокутааттарын, улуус актыбыыстарын кытта көрсөн кэпсэппитэ.
«Өрөспүүбүлүкэ нэһилиэнньэтин санаатын учуоттаан туран, биир таһымнаах олохтоох салайыныыга көһүү туһунан мөккүөрү тохтоттубут. Дойдубут киэҥ сиринэн тайаан сытарын учуоттаан, олохсуйбут үгэскэ, сири үллэриигэ тирэҕирэн, олохтоох салайыныы урукку көрүҥүн оннунан хааллары ситистибит», — диэбитэ Ил Түмэн Бэрэссэдээтэлэ Алескей Еремеев.
Кини федеральнай киин эрэгийиэннэргэ сокуон быһыытынан судаарыстыбаннай уонна муниципальнай былаас икки ардыгар боломуочуйаны тыырыы болдьоҕун 2028 с. тохсунньу 1 күнүгэр диэри уһаппытын туһунан бэлиэтээбитэ.
Ил Түмэн итини ырытан баран өрөспүүбүлүкэ сокуонун 2027 с. бастакы аҥаарыгар ылынар былааннаах. Саха Сирэ география уонна экэниэмикэ өттүнэн уратылаах, улуустарга нэһилиэнньэ ахсаана, тырааныспар сырыыта, дьон дохуота тус-туһунан. Ол иһин спикер этэринэн, күһүҥҥү сиэссийэ бастакы соруга бүддьүөтүнэн хааччыллыы ньымата сөптөөх уонна тэҥ буолуохтаах. Сүрүн сорук быһыытынан, бары таһымҥа хайдах гынан олохтоох бүддьүөтү дохуотунан толорууну толкуйдуохтара.
Ону таһынан, спикер болҕомтону тыа хаһаайыстыбатыгар уурар: «Муниципалитеттар бырааптарын кэҥэтиэхтээхпит. Оройуоннар 2024 с. бэриллибит боломуочуйанан иккис сылларын үлэлииллэр, олох көрдөрөрүнэн, субсидияны тыырыыга кэккэ хааччахтар бааллар. Ону кэтээн көрөр уорганнар кэһии быһыытынан ааҕаллар, ол иһин нормативнай бааза уларытыллыахтаах», — диэн эппитэ.
Итини сэргэ, өрөспүүбүлүкэ таһымыгар оскуола уонна уһуйаан салайыытын төнүннэрии туһунан дьүүллэһэллэр, урут доруобуйа харыстабыла кииннэммитин курдук. Улуустар үп-хааһына управлениеларын СӨ Үбүн министиэристибэтигэр биэрэр туһунан этиини көрүөхтэрэ, оччоҕуна бүддьүөт дьиссипилиинэтэ күүһүрүө, Аартыка улуустарыгар үлэһит дэписиитэ быһаарыллыа.
Өрөспүүбүлүкэҕэ ити салаалары биэрдэхтэринэ, муниципальнай былаас оруола төрдүттэн уларыйыа. Үөрэх салаатын, ОДьКХ-ны таарыйар быһаарыныы дириҥ, киэҥ өрүттээх чинчийиини ааһыахтаах. Бу уларыйыылары сокуон быһыытынан ылыныах иннинэ дьокутааттар икки өрүтүн ырытан көрүөхтэрэ. Ол туһунан "Ил Түмэн" пресс-сулууспата иһитиннэрэр.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
