Виктор Николаевич Аартыка оройуоннарын аһынан-үөлүнэн хааччыйыы кыһалҕата күн бүгүнүгэр диэри сытыытык турарын эттэ.
– Аартыка оройуоннарын аһынан-үөлүнэн хааччыйыы олох мөлтөх. Урут, сэбиэскэй кэмҥэ, Хотугу муора суолунан 30-40 уу аала баржанан бородуукта таһара. Судаарыстыба Халыма уонна Индигиир оройуоннарын бүтүннүү хааччыйара. Күн бүгүн биир-икки баржа сылдьар. Инньэ гынан, хотугу түөлбэ олохтооҕун бородууктатын нуорматын 30 % эрэ хааччыйабыт.
Аны сөмөлүөтүнэн айан төлөбүрэ аһара ыарахан. Тарыыптары түһэрии туһунан элбэх кэпсэтии тахсар да, күттүөннээх быһаарыныы билиҥҥитэ ылылла илик. Онон ыйытабын. 2021 сылтан ити кыһалҕалары баһааран саҕалыыбыт дуу, суох дуу?
Норуот дьокутаатын боппуруоһугар Уһук Илин уонна Аартыка сайдыытын миниистирин солбуйааччы Александр Крутиков хоруйдаата:
– Виктор Николаевич, эйигин кытта сөбүлэһэбин. Билигин Хотугу муора суолунан Аартыка аһынан-үөлүнэн ситэ хааччылла илик. Эрэгийиэн бэйэтин күүһүнэн эмиэ ити кыһалҕалары быһаарар кыаҕа суох. Онон билигин Хотугу муора суолун туһунан федеральнай сокуон барылын оҥоро сылдьабыт. Судаарыстыба өйөбүлүн бүтүн систиэмэтин оҥоруохтаахпыт. Ол гынан баран, бу систиэмэ дьэҥкир буолуохтаах. Билиҥҥи курдук үгүс тиксиһиннэрээччилэрэ, айах адаҕалара суох. Үксүгэр кинилэр суоттарыгар сыана ыараан тиийэр. Ити үлэҕэ судаарыстыбаннай резервэ аҕыаныстыбатын кыттыһыннардыбыт. Кинилэр ити хайысхаҕа үлэлииргэ бэлэмнэрин биллэрдилэр. Маны таһынан, билиҥҥитэ табыгастаах логистиканы толкуйдуубут. Ити курдук, ыраах түөлбэлэргэ олорор дьон бэйэлэрин итэҕэстээх курдук санамматтарын туһугар тустаах үлэ-хамнас барара былааннанар, – диэтэ.
-
0
-
0
-
0
-
0
-
0
-
0
