Бэлиитикэ

Сүрүн иһитиннэриини оҥорбут үөрэх миниистирин солбуйааччы Владимир Тихонов информационнай ситимнэри толору кыахтарынан туһаныы ситиһиллэ илигин бэлиэтээтэ. Ол сүрүн биричиинэлэринэн хас да ситиминэн үлэлиир, итиэннэ дааннайдары бэйэлэрэ илиилэринэн киллэрэр буоланнар, учууталлар олус улахан ноҕуруускаҕа сылдьаллара, үөрэхтээһин верифицированнай цифровой контена ситэтэ суоҕа, ону «түмэргэ» биир ирдэбилинэн арыаллыыр кэлим тиһик суоҕа; гаджеттар, цифровой  технологиялар иитии-үөрэтии эйгэтигэр интеграциялара мөлтөҕө буоларын ыйда.

Ити түмүгэр «улахан чахчылары» оҥорууга ыарахаттар үөскүүллэрин эттэ. Бу боппуруоһу быһаарарга элбэх үлэ эрэйиллэр, ол иһигэр иитэр-үөрэтэр тэрилтэлэргэ информационнай аныгы инфраструктураны оҥоруу, электроннай өҥөлөрү киллэрии, электроннай киэбинэн үөрэтиини тэрийии, онуоха сөп түбэһэр каадыры бэлэмнээһин ирдэнэр эбит.

Өрөспүүбүлүкэ үрдүнэн 735 уһуйаан, 641 уопсай үөрэхтээһин, 176 эбии үөрэхтээһин, 42 идэтийбит үөрэхтээһин тэрилтэлэрэ бааллар. Олортон 2019 сылтан Интернеккэ 434 тэрилтэ холбоммут: 284 тэрилтэ оптоволокноҕа, 143 тэрилтэ аргыс сибээһинэн, 7 тэрилтэ радиорелейнай ситиминэн. Быйыл 209 тэрилтэ холбонуохтаах, оччотугар иитэр-үөрэтэр тэрилтэ 100 %-а Интернетинэн хабыллыахтаах.   

Инновацияҕа, цифровой сайдыыга уонна инфокоммуникационнай  технологияларга миниистири бастакы солбуйааччы Петр Николаев экэниэмикэ уонна социальнай эйгэ сүрүн салааларыгар (доруобуйа харыстабылыгар, үөрэхтээһиҥҥэ), судаарыстыбаннай салалтаҕа цифровой технологияны көдьүүстээхтик туһаныыны ситиһэр, электроннай киэбинэн социальнай суолталаах өҥөнү оҥорууну 95 %-ҥа, нэһилиэнньэ Интернети туһаныытын 97 %-ҥа тиэрдэр, ол эбэтэр 2019 сылга тэҥнээтэххэ информационнай технологиялары туһаныыны түөрт төгүл улаатыннарар сорук турарын эттэ. Салгыы «Арассыыйа Федерациятыгар цифровой экэнэмиэкэ» национальнай бырагыраама «Информационнай инфраструктура» федеральнай бырайыагынан 2019 сыллаахтан өрөспүүбүлүкэҕэ туох үлэ ыытыллыбытын иһитиннэрдэ, быйылгы сыл былаанын билиһиннэрдэ. 

Норуот дьокутааттара Игорь Григорьев, Иван Данилов, Валерий Лютай, Яков Ефимов, Мичил Николаев, Андрей Находкин, Иннокентий Романов цифровой технологиялар эйгэлэрин салайыы төһө көдьүүстээҕин,  нуормаламмыт-быраап аахталарыгар төһө түбэһэрин, үөрэхтээһин эйгэтигэр стартабы киллэрии, исписэлиистэри бэлэмнээһин хайдах ыытылларын, IT-салааҕа кэскиллээх исписэлиистэргэ туох көҕүлээһин баарын, нэһилиэнньэни цифровой технологияны туһаныыга үөрэтии, хааччыйыы бырагырааматын Арассыыйатааҕы көрүҥнэрин, о.д.а. тустарынан иҥэн-тоҥон ыйыттылар.

Норуот дьокутаата Игорь Григорьев болҕомтотун үөрэх миниистирин солбуйааччы дакылаатыгар быйыл хас биирдии нэһилиэнньэлээх пууҥҥа цифровой интернет киллэриллэрин эппитигэр туһаайда. Холобур, интернет төрүт суох сиригэр ити былаан олоххо киирэрэ төһө оруннааҕын ыйытта. Онуоха өрөспүүбүлүкэ оскуолалара бары аан ситимҥэ холбонон тураллара, цифровой интернет суох сиригэр сибээс аргыс ханаала баара быһаарылынна.  

Яков Ефимов цифровой технологияларга үөрэтиигэ бүддьүөккэ анал харчыны көрөргө этии киллэрдэ.  

-- Цифровой технологиялары киллэрии аныгы олох ирдэбилэ буолар, – диэтилэр норуот дьокутааттара, итиэннэ Интернетинэн туһаныыга нэһилиэнньэ киэҥ араҥатын хабар инниттэн иитэр-үөрэтэр тэрилтэлэргэ барыларыгар цифровой үөрэхтээһиҥҥэ эбии чаастары көрөргө эттилэр.  

Хонтуруоллуур кэмитиэт бэрэссэдээтэлэ Андрей Николаев мунньаҕы  түмүктүүрүгэр дьокутааттарга көхтөөхтүк кыттыбыттарын, дакылаатчыттарга киэҥ ис хоһоонноох, толору иһитиннэриини оҥорбуттарын иһин махтанарын биллэрдэ. Дакылааттары кэмитиэт сибидиэнньэҕэ ылбытын эттэ.