Бэлиитикэ

Тэрээһиҥҥэ Ил Түмэн сиргэ, айылҕа ресурсаларыгар уонна экологияҕа сис кэмитиэтин  бэрэссэдээтэлэ Сахамин Афанасьев, нэһилиэк баһылыктара, Өймөкөөн улууһун бэрэстэбиитэллэрэ, Дьокуускайдааҕы Николай Кривошапкин аатын сүгэр 5 №-дээх орто оскуола салалтата, аймахтара, кыраайы үөрэтээччилэр, уопсастыбанньыктар уо.д.а. кыттыыны ыллылар.

Өймөкөөн улууһун баһылыга Иннокентий Сивцев САССР тэриллибитэ  үбүлүөйдээх 100 сылынан, бастакы гильдиялаах саха атыыһыта, меценат, сырдатааччы, гуманист Николай Осипович Кривошапкин 185 сылын бэлиэтиир тэрээһиннэр чэрчилэринэн, 2022 сыл Өймөкөөн улууһугар Үтүө дьыала сылынан биллэриллибитин бэлиэтээтэ. Ону сэргэ архыып докумуоннарынан уонна хаартыскаларын хомуурунньугунан соторутааҕыта Тамара Васильева бэлэмнээбит фотоальбома  бэчээттэммитин туһунан иһитиннэрдэ.

Тэрээһини Өймөкөөн улууһун култуураҕа уонна туризмы сайыннарыыга салалтатын отделын начаалынньыга Аксинья Сивцева иилээн-саҕалаан ыытта. Меценат Николай Кривошапкин олоҕун уонна үлэтин туһунан Арассыыйа үтүөлээх учуутала, М.Н. Заболоцкай-Чысхаан аатынан Томтор орто оскуолатын иһинэн кыраайы үөрэтэр литературнай түмэл төрүттээччитэ Мария Боярова кэпсээтэ.

Өймөкөөн улууһун дьаһалтата Дьокуускайдааҕы 5 №-дээх орто оскуоланы кытта ыкса үлэлиирэ бэлиэтэннэ. Оскуола дириэктэрэ Алексей Семенов «Тымныы полюһа» бэстибээл тэрийээччилэриттэн биирдэстэрэ. Ол курдук, быйыл бэстибээл чэрчитинэн, Тас-Кыстаабыт сиһигэр (Сарычев хайатын сиһэ) Афродит хайа 2060 миэтэрэ чыпчаалыгар үбүлүөйдээх тахсыыны бэлиэтээбиттэр.

Салгыы 5 №-дээх оскуола эбии үөрэхтээһиҥҥэ педагога, «История харыстааччылара» историческай бырайыак салайааччыта Анна Борисова тыл эттэ. Кини Тамара Егоровна Васильева бэлэмнээбит саҥа альбомугар Николай Кривошапкин хаартыскаларынан саҥа биллибит чахчылар тустарынан сиһилии сырдатта. Өймөкөөн улууһугар ыытыллыахтаах Олоҥхо ыһыаҕын чэрчитинэн, бу альбом эбии бэчээттэнэрин иһитиннэрдэ. Ол кэннэ меценат судаарыстыбаннай бэлиэлээх кыһыл көмүс чаһыытын туһунан иһитиннэриини 5 №-дээх орто оскуола үөрэнээччитэ Артем Котляр оҥордо.

Өймөкөөн улууһун култуураҕа уонна туризмы сайыннарыыга салалтатын начаалынньыга Аксинья Сивцева «Меценат мэтириэтэ» диэн норуот бырайыага буоларын эттэ. Бырайыак көҕүлээччитэ  - Семен Семенович Сивцев– Өймөкөөн Сэмэнэ. Улуус олохтоохторо кини көҕүлээһинин өйөөннөр, уруһуйдьутунан дойду биллиилээх худуоһунньуга,  Арассыыйа худуоһунньуктарын Сойууһун чилиэнэ, СӨ ускуустубатын үтүөлээх диэйэтэлэ Александра Бочкареваны-Иннокентьеваны талбыттара. Кини өрөспүүбүлүкэ араас суруйааччыларын, учуонайдарын, артыыстарын, уопсастыбаннай диэйэтэллэрин мэтириэттэрин ааптара. Александра Самсоновна Былатыан Ойуунускай, Иван Федосеев-Доосо курдук биллиилэх дьон, барыта 200-тэн тахса киһи мэтириэттэрин суруйбута. Үлэлэрэ үксүтэ Хатырык нэһилиэгэр хараллан тураллар.  Маны таһынан Бочкарева айар үлэтигэр туспа миэстэни Олоҥхо дойдута ылар. Ол курдук, 1996 сыллаахха суруллубут «Олоҥхо» диэн хартыыната Ытык-Күөл орто оскуолатын киэргэтэр. Уруһуй уопсай кээмэйэ 88 кв.м.

Александра Самсоновна дьыалаҕа эппиэтинэстээхтик сыһыаннаспыта бэлиэтэннэ. Ол курдук, кини меценат биографиятын уонна историческай матырыйааллары үөрэтэн, кыраайы үөрэтээччилэри кытта көрсүһэн хартыынатын суруйбут. Түмүгэр Николай Кривошапкин мэтириэтэ эрэ буолбакка, меценат оҥорбут үтүө дьыалаларын биэс чааһын көрдөрөр.

Худуоһунньук Өймө­көөҥҥө Николай Кривошапкин дьиэтин чөлүгэр түһэриинэн дьарыктанар, хартыынаҕа ааптарскай арааманы оҥорбут Таатта улууһун олохтооҕор Владислав Малгиҥҥа махтанна. Ил Түмэн аатыттан норуот дьокутаата Сахамин Афанасьев хартыынаны бар дьоҥҥо билиһиннэрэр үтүө түгэнинэн эҕэрдэлээтэ.

 - Саха Сирэ Арассыыйа састаабыгар киирбитэ 390 сылыгар аналлаах историческай дьаһаллар чэрчилэринэн бүгүн биһиги меценаттарбытын эрэ буолбакка, үөрэх сайдыытыгар киллэриллибит сүдү кылааты эмиэ бэлиэтиибит. Николай Осипович бэйэтин үбүн-харчытын суотугар өрөспүүбүлүкэ киин куоратыгар оскуоланы туттарбыт соҕотох меценат быһыытынан биллэр. Маннык түбэлтэ билиҥҥэ диэри ханна да бэлиэтэнэ илик. Бу элбэҕи этэр», - диэтэ Сахамин Афанасьев. Түмүгэр Сахамин Миланович Александра Бочкареваҕа-Иннокентьеваҕа махтанна.