Санаттахха, оробуочай сырыы маҥнайгы күнүгэр, мунньах иннигэр Алексей Корниенко Аартыкатааҕы судаарыстыбаннай агротехнология университетыгар сылдьан, преподавателлэри уонна устудьуоннары кытары, оттон Сергей Левченко 2 №-дээх ГРЭС-кэ сылдьан, ититэр уонна уоту биэрэр ыстаансыйа кэлэктиибин кытары көрсүспүттэрэ. Ил Түмэҥҥэ мунньаҕы Ил Түмэн Бэрэссэдээтэлэ Алексей Еремеев иилээн-саҕалаан ыытта.
Леонид Калашников бэлиэтээбитинэн, Ил Түмэҥҥэ Госдума үлэтин-хамнаһын туһунан сырдатар, сирэй көрсөн олорон, ыйытыктарга хоруйдары булар уонна этиилэри истэр кыах урут кинилэргэ тосхойботох эбит.
– Кэмитиэт көдьүүстээх үлэтэ судаарыстыбалар икки ардыларыгар хайдах сыһыаны олохтуурбутуттан тутулуктаах, – диэтэ Леонид Калашников, итиэннэ Арассыыйа Федерациятын Бырабыыталыстыбатын бэрэссэдээтэлэ Михаил Мишустины кытары көрсүһүү түмүгүн, «хотугу собуос» туһунан федеральнай сокуон барыла кулун тутарга бастакы ааҕыыга ылыллыбытын, уот тарыыбын, олорор дьиэ-уот субсидиятын, дьиэ сэртипикээтин тустарынан кэпсээтэ. – Ити боппуруостар бары Уһук Илин уокурук олохтоохторун олус долгуталлар уонна кинилэргэ быһаччы сыһыаннаахтар. Ол эрээри, олорор дьиэ-уот субсидиятыгар федеральнай бүддьүөккэ 4 млрд солк. көрүллүбүтэ уонна 1300 сэртипикээт ууруллубут суумалара олус кыра. Биһиги бу суума хас да төгүл улаатыахтаах дии саныыбыт, – диэтэ.
Госдума дьокутаата Сергей Левченко тыа сиригэр электроэнергия төлөбүрүн тарыыптарын тэҥниир туһунан боппуруоһу көтөхтө. Холобур, тыа сиригэр тарыып – биир, оттон ыаллыы сытар куораттарга – атын. – Бу сытыы боппуруос нэһилиэнньэҕэ эрэ буолбакка, оҥорон таһаарар тэрилтэлэргэ сыһыаннаан инникитин элбэх үлэни эрэйэр, – диэн бэлиэтээтэ. Булуҥҥа тыал күүһүнэн үлэлиир, Дьааҥыга күн уотун күүһүнэн үлэлиир ыстаансыйалары туһаныы уопуттарыгар тирэҕирэн, хаттаан сөргүтүллэр эниэргийэни оҥорон туһанарга этии киллэрдэ. Оттон оҥорон таһаарыы, ситим уонна туһаныы бары мэхэньииһимин «биир илиигэ» оннунан хаалларар наадалаҕар тохтоото.
– Бу хайысханан олус элбэх үлэ күүтэр, онон бары бииргэ ыкса уонна хардарыта көмөлөсүһэн үлэлиирбит наада, – диэн норуот дьокутааттарыгар Сергей Левченко сүбэлээтэ. Норуот дьокутааттара ыалдьыттарыгар элбэх ыйытыыны биэрдилэр.
Көрсүһүү түмүгүнэн Ил Түмэн бэрэссэдээтэлэ Госдума дьокутааттарыгар сиһилии хоруйдары биэрбиттэригэр махтанна. – Биһиги билигин судургута суох кэмҥэ олоробут уонна дойдубут интэриэһин көмүскүөх тустаахпыт. Өрөспүүбүлүкэ былааһын уорганнара, уопсастыбаннай институттара дойду Бэрэсидьиэнэ Владимир Путин ыытар бэлиитикэтин өйдүүллэр уонна өйүүллэр.
Саҕаламмыты тиһэҕэр хайдах тиэрдэрбититтэн кэлэр өттүгэр Евразийскай холбоһук кэскилин түстүүрбүт тутулуктаах, – диэн Алексей Еремеев көрсүһүүнү түмүктээтэ.
-
0
-
0
-
0
-
0
-
0
-
0
