Сыл түмүгэр, үгэс быһыытынан ахсынньы ыйга ыытыллар мунньахха улуустар бэрэстэбиитэллэрэ өрөспүүбүлүкэ социальнай-экэнэмиичэскэй сайдыытын уонна олохтоох салайыныы тиһигин реформалааһын боппуруостарын дьүллэһиэхтэрэ.
Парламент испиикэрэ Алексей Еремеев тэрээһин суолтатын: “Бэрэстэбиитэллэх уорганнар Сэбиэттэрэ – Саха Сирин олоҕун сүрүн аспектарын дьүүллэһии былаһаакката. Билигин өрөспүүбүлүкэ иннигэр турар социальнай-экэнэмиичэскэй соруктары көдьүүстээхтик быһаарыыга муниципальнай былаас уорганнарын кытары ыкса бииргэ үлэлэһэр наада”, -диэн бэлиэтиир.
Ону тэҥэ, мунньах бэбиэскэтигэр 2025 сылга уонна былааннаах 2026-2027 сылларга СӨ судаарыстыбаннай бүддьүөтүн параметардарын, НДФЛ тутуллутун нуорматын көрүү турар. Салгыы дьүүллэһиигэ 2025 сыл тохсунньу 1 күнүттэн нэһилиэнньэҕэ электроэниэргийэ тарыыбын уларыйыытын, олохтоох салайыныы туһунан федеральнай сокуон чэрчитинэн саҥа киириилэри уонна муниципальнай тэрээһиннэргэ бүддьүөт процеһын саҥардыы актуальнай боппуруостарын көрүөхтэрэ.
Сүрүн боппуруостары тэҥэ, мунньахха “СӨ Аҕа дойду буойуннарын дьиэ кэргэттэрин Кэмитиэтэ” АНО үлэтин-хамнаһын туһунан дакылааты уонна “Аартыка: билиҥҥитэ уонна сарсыҥҥыта” норуоттар икки ардыларынааҕы XIV пуорумҥа өрөспүүбүлүкэ кыттыытын түмүктэрин билиһиннэриэхтэрэ.
Мунньахха муниципальнай тэрээһиннэр бэрэстэбиитэллээх уорганнарын дьокутааттара, Ил Түмэн дьокутааттара, СӨ Ил Дарханын уонна Бырабыыталыстыбатын Дьаһалтатын, министиэристибэлэр уонна биэдэмистибэлэр бэрэстээбиитэллэрэ, улуустар баһылыктара кыттыахтара.
Матырыйаал, хаартыска Ил Түмэн пресс-сулууспатын саайтыттан
-
0
-
0
-
0
-
0
-
0
-
0
