Бэлиитикэ

Парламентскай истиини СӨ Ил Түмэн Судаарыстыбаннай Мунньаҕын тутууга, ДьУоХХ уонна энергетикаҕа сис кэмитиэтэ видео-кэмпириэнсийэ көрүҥүнэн тэрийдэ.

Мунньаҕы парламент спикера Петр Гоголев салайан ыытта. Кини парламентскай истиини анал үлэлиир бөлөх тэрийбитин бэлиэтээтэ. Ол курдук, үлэлиир бөлөххө Ил Түмэн Судаарыстыбаннай Мунньаҕын тутууга, ДьУоХХ уонна энергетикаҕа сис кэмитиэтин бэрэссэдээтэлэ Яков Ефимов, СӨ Бырабыытылыстыбатын бэрэссэдээтэлин бастакы солбуйааччытын э.т. Кирилл Бычков, норуот дьокутааттара Елена Голомарева, Евгений Кожухов, Павел Ксенофонтов, өрөспүүбүлүкэ толорор былааһын уорганнарын бэрэстэбиитэллэрэ Павел Кылатчанов, Павел Аргунов, Наталья Чусовская, Ил Түмэн судаарыстыбаннай правовой салалтатын старшай референа Владислав Оконешников киирбиттэрин иһитиннэрдэ.  

Сүрүн дакылааты СӨ тутууга миниистирэ Павел Кылатчанов оҥордо. Кини 2019 сыл сэтинньи ыйыттан өрөспүүбүлүкэҕэ “Өлүүлэммит (долевой) тутуу кыттыгастарын бырааптарын көмүскүүр пуонда” (УНО “”Фонд Республики Саха (Якутия) по защите прав граждан-участников долевого строительства”) үлэлиирин бэлиэтээтэ. Бу пуонда моҥкуруоттаабыт тутааччылар эбийиэктэрин үлэҕэ киллэрэргэ көмөлөһөр соруктаах.

Тутуу миниистирэ бүгүҥҥү туругунан өрөспүүбүлүкэ үрдүнэн 7 тутуу хампаанньатын 14 эбийиэгэ сир-халлаан икки ардыгар ыйаммыттарын кэпсээтэ. Ол курдук, “Симиир” ХЭУо, “Монолит-Строй” ХЭУо, “Черов и К” СПФ ХЭУо, “ИИТИИ” ПИП РОФ, “Строймонтаж-2002” ХЭУо, “Якутпромстрой” АУо, “Союзстрой” ХЭУо эбийиэктэрэ кыһалҕалаахтар ахсааннарыгар киирбиттэр. Балар уопсайа 637 долевой тутуу дуогабарын 933 киһини кытта түһэрсибиттэр.

– Ити 14 эбийиэги үлэҕэ киллэрэргэ 1 млрд. 289 мөл. солк. наада. 2019 сыл алтынньы ыйыгар долевой тутуу кыттыгастарын бырааптарын көмүскүүр пуонданы кытта сөбүлэҥ түһэрсиллибитэ. Онон 4 эбийиэги ситэрэн тутууга 660 мөл. солк. көрүллүбүтэ. Итиннэ өрөспүүбүлүкэ 8 % кыттыгас үбүлээһини укпута, о.э. 57 мөл. солк., – диэн Павел Кылатчанов иһитиннэрдэ.

Павел Павлович бу сыл сэтинньи ыйыгар пуонданы кытта өссө 331 мөл. солк. суумаҕа сөбүлэҥ түһэрсиллиэхтээҕин бэлиэтээтэ. Онно өрөспүүбүлүкэ 28,8 мөл. солк. кыттыһыахтаах. Миниистир ити үп өрөспүүбүлүкэ 2020 сыллааҕы бүддьүөтүн көннөрүүтүгэр номнуо учуоттаммытын бэлиэтээтэ.

– Билигин пуондаттан икки эбийиэги эбии үбүлүүллэригэр көрдөстүбүт. Ол курдук, Чурапчы сэлиэнньэтин Ленин уулуссатыгар тутулла турар элбэх кыбартыыраах дьиэни уонна Дьокуускай куорат Кальвица уулуссатыгар “Строймонтаж-2002” тутан саҕалаабыт дьиэтин 2021 сылга үлэҕэ киллэрэр былааннаахпыт, – диэн миниистир кэпсээтэ.

Маны таһынан, тутуу миниистирэ долевой тутуу кыттыгастарын бырааптарын көмүскүүргэ туох механизмнар үлэлииллэрин сиһилии быһаарда.

– Суобаһа суох тутааччылартан эмсэҕэлээбиттэргэ уонна “хаттаан атыылааһын” албыныгар киирэн биэрбиттэргэ эрэгийиэннээҕи көмөлөр оҥоһуллаллар. Быйыл өрөспүүбүлүкэ бүддьүөтүгэр ити сыалга 50 мөл. 103 тыһ. солк. көрүллүбүтэ. 2020 сыл атырдьах ыйыгар 40 киһиэхэ харчынан көмөнү оҥордубут. Көмөҕө тиксэргэ эмсэҕэлээбит киһи 2021 сыл тохсунньу 1 күнүгэр диэри олохтоох дьаһалтаҕа кэлэн сайабылыанньа толоруохтаах, – диэн миниистир чопчулаата.

Тутуу миниистирэ реестрга хаалбыт 10 эбийиэк кыһалҕаларын быһаарарга  саҥа механизмнар оҥоһулла сылдьалларын уонна боппуруос быһаарыллар кыахтааҕын бэлиэтээтэ.   

Дакылааты истэн баран, норуот дьокутааттара бэйэлэрин ыйытыыларын биэрдилэр.

Ил Түмэн спикера Петр Гоголев тутуу министиэристибэтэ гражданнар бырааптарын көмүскүүргэ инникитин туох былааннааҕын ыйытта.  

Норуот дьокутаата Михаил Гуляев “Строймонтаж-2002” туох бириичиинэнэн кыһалҕалаах хампаанньалар ахсааннарыгар хапсыбытын сураста.

Дьокутаат Алена Атласова суобаһа суох тутааччылар туох эппиэтинэскэ тардыллыбыттарын чуолкайдаата.

Парламентарий Юрий Баишев суобаһа суох тутааччыларга эппиэтинэһи үрдэтэргэ этии киллэрдэ. Ону сэргэ, 2021 сылга эмсэҕэлээбиттэргэ төһө суумалаах судаарыстыбаннай көмө оҥоһуллара былааннаммытын ыйытта.

Норуот дьокутаата Павел Петров суобаһа суох тутааччылар кыһалҕалаахтарын да үрдүнэн тутуу эйгэтиттэн тахсыбакка үлэлииллэрин бэлиэтээтэ. Кини буруйдаах тутааччылары эппиэккэ тардарга диэн этии киллэрдэ.

Мунньах түмүктүүр чааһыгар Петр Гоголев киирбит этиилэри Ил Түмэн Судаарыстыбаннай Мунньаҕын тутууга сис кэмитиэтэ барытын үөрэтиэҕэ уонна парламентскай истиилэр бырайыактарыгар киллэриэҕэ диэн эрэннэрдэ.

Ил Түмэн пресс-сулууспатын матырыйаалынан.