Сэтинньи 10 күнүгэр Ил Түмэн Судаарыстыбаннай Мунньаҕын XXI уочараттаах пленарнай мунньаҕар Айсен Сергеевич Саха Өрөспүүбүлүкэтин Бырабыыталыстыбатын саҥа чилиэттэринэн кимнээҕи бигэргэтиэн баҕарарын биллэрдэ. Норуот дьокутааттара кандидатуралары кытта билсэн баран, кистэлэҥ куоластааһыҥҥа киллэрдилэр. Куоластааһын түмүгүнэн Ил Дархан саҥа састаабы дуоһунастарыгар бүтэһиктээхтик бигэргэтэригэр сөбүлэҥ ылла. Ол курдук, норуот дьокутааттара:
Андрей Владимирович Тарасенко СӨ Бырабыыталыстыбатын Бэрэссэдээтэлин дуоһунаһыгар бигэргэнэригэр сөбүлэстилэр (өйүүбүн – 48 куолас, утарабын – 0, туттунабын – 1).
Кирилл Евгеньевич Бычкову СӨ Бырабыыталыстыбатын Бэрэссэдээтэлин бастакы солбуйааччытынан аныырын өйөөтүлэр (куоластааһын түмүгэ: өйүүбүн – 45 куолас, утарабын – 2, туттунабын – 2).
Сергей Васильевич Местников СӨ Бырабыыталыстыбатын Бэрэссэдээтэлин солбуйааччытын дуоһунаһыгар бигэргэнэригэр сөбүлэҥнэрин биэрдилэр (куоластааһын түмүгэ: өйүүбүн – 46 куолас, утарабын – 2, туттунабын – 1).
Михаил Викторович Никифоров СӨ Бырабыыталыстыбатын Бэрэссэдээтэлин солбуйааччытын дуоһунаһыгар киирэрин өйөөтүлэр (куоластааһын түмүгэ: өйүүбүн – 48 куолас, утарабын – 1, туттунабын – 0).
Павел Владимирович Иванов СӨ Баайга-дуолга уонна сир сыһыаннаһыыларыгар миниистиринэн ананарыгар сөбүлэстилэр (куоластааһын түмүгэ: өйүүбүн – 48 куолас, утарабын – 1, туттунабын – 0).
СӨ Ил Дархана Айсен Николаев бүгүҥҥү Ыйааҕынан ааттаммыт хандьыдааттары дуоһунастарыгар бигэргэтэрин туһунан иһитиннэрдэ.
Маны таһынан, Алексей Михайлович Ефимов СӨ Конституционнай суутун суудьуйатынан ананан андаҕар биэрдэ.
- 0
- 0
- 0
- 0
- 0
- 0