СӨ Судаарыстыбаннай Мунньаҕын Бэрэссэдээтэлэ Петр Гоголев салайааччылаах дэлэгээссийэҕэ ыччат дьыалаларыгар, физическэй култуураҕа уонна успуорка сис кэмитиэтин бэрэссэдээтэлэ Михаил Гуляев, тутууга, хомунаалынай хаһаайыстыбаҕа уонна энэргиэтикэҕэ сис кэмитиэтин бэрэссэдээтэлэ Яков Ефимов, тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин, доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Владимир Чичигинаров уонна норуодунай дьокутаат Виктор Лебедев бааллар.
Таатта улууһун кыраныыссатыгар кинилэри Таатта улууһун баһылыга Михаил Соров, улуус дьокутааттарын сэбиэтин бэрэссэдээтэлэ Валентин Охотин көрүстүлэр.
Чөркөөххө кэлэн, Октябрьскай нэһилиэк дьаһалтатыгар (баһ. А.П. Семенов), П.А. Ойуунускай аатын сүгэр оскуолаҕа (дир. С.В. Сунхалыров), Судаарыстыбаннас мусуойугар (дир. М.Г. Аржаков), Ойуунускай Дэлбэрийбит алааһыгар сырыттылар.
Чөркөөх олохтоохторо чааһынай дьиэлэри киин ититэр систиэмэҕэ холбонуу бырагырааматын сөргүтэргэ эттилэр. Үлэлии турар хочуолунай ону кыайар кыамталааҕын нэһилиэк баһылыга Андрей Семенов бэлиэтээтэ. Нэһилиэнньэни хаһаайыстыбаннай уунан хааччыйыыга шлюз-регулятор оҥоһуллуон наадатын, онуоха бырайыактыыр-сметалыыр докумуонун оҥортороллоругар үбү булар боппуруос уустугун кэпсээтилэр.
Саха АССР 100 сылын көрсө дьэндэйиэхтээх култуурунай киин тутуллуутун Ил Түмэн дьокутаата Яков Ефимов өйөөбүтүн иһин нэһилиэнньэ аатыттан нэһилиэк дьокутаата Георгий Огоюкин бар дьон иннигэр махтанна.
Чөркөөхтөөҕү историческай-мемориальнай мусуой сэбиэдиссэйэ Николай Попов Ойуунускай үөрэммит дьиэтин таһыгар ситэ тутуллубакка турар дьиэни мусуой бас билиитигэр ылан, ыалдьыттары, туристары хоннорор көстүүнэй оҥорор баҕа санаалааҕын эттэ.
Спикер Петр Гоголев Чөркөөх үөрэнээччилэри кытта Ойуунускай 100 сыллаах улуу былаанын туһунан кэпсэттэ. Оҕолор кэлэр кэм туһунан баҕа санааларын ыйыталаста.
Салгыы дьокутааттар Харбалаахха тиийэн, “Төлөн” чоҕу хостуур тэрилтэ үлэтин билсиэхтэрэ, Амма Аччыгыйын аатынан оскуолаҕа сылдьыахтара, социальнай эбийиэктэри кэрийиэхтэрэ.
Сарсын кулун тутар 11 күнүгэр Ытык Күөлгэ улуус актыыбын кытта улахан мунньах буолуоҕа. Эбиэттэн киэһэ Баайаҕаҕа айанныахтара.
- 0
- 0
- 0
- 0
- 0
- 0