Бэлиитикэ

Саҥа конституционнай сокуон барылын көннөрүүлэрин сүнньүнэн Ил Түмэн Судаарыстыбаннай Мунньаҕын билимҥэ, үөрэххэ, култуураҕа, иһитиннэриилэри киэҥник тарҕатар сириэстибэлэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева быһаарыыта:

– Билигин өрөспүүбүлүкэ нэһилиэнньэтэ Төрүт сокуоҥҥа киириэхтээх көннөрүүлэри дьүүллэһиигэ көхтөөхтүк кытта сылдьар. Санатан эттэххэ, бу көннөрүүлэр былырыын уопсай куоластааһынынан РФ Төрүт сокуонугар ылыллыбыт уларытыыларга сөп түбэһэллэр.

Бары үчүгэйдик билэрбит курдук, Саха Өрөспүүбүлүкэтин Төрүт сокуона – хас да көлүөнэ дьон сыралаах үлэлэрин түмүгэ. Онон, бастатан туран, Төрүт сокуоҥҥа харыстабыллаах сыһыан баар буолуохтаах.

Бу сыл устата үс үлэлиир бөлөх тэриллэн конституционнай сокуон барылын сүнньүнэн үлэлээтэ. Мин социальнай блокка үлэлэстим. Маныаха саҥа көннөрүүлэр саҥа кэм ирдэбиллэригэр толору эппиэттииллэр уонна барыбытыгар сайдыы саҥа саҕахтарын арыйаллар диэн бэлиэтиэхпин баҕарабын. Ол курдук, бастатан туран, оҕо-аймах дьоллоох буолуута – судаарыстыбаннай бэлиитикэ сүрүн тосхоло буолара ыйылынна. Мантан ыла оҕолору духуобунай, өй-санаа уонна эт-хаан өттүнэн сайыннарыы, патриотизм тыыныгар уонна аҕа көлүөнэҕэ ытыктабыллаах буолууга иитии нормативнай правовой аакталарга суруллар буолуоҕа. Маны сэргэ, дьиэ кэргэн өйдөбүлэ киирдэ. Биһиэхэ ити өйдөбүл төрүт үгэстэрбитин, этнопедагогиканы уо.д.а. кытта ыкса ситимнээх.

Аны туран, култуура – Саха Өрөспүүбүлүкэтин бары омуктарын нэһилиэстибэтэ буолара этиллэр. Онон Арассыыйа устуоруйатыгар аан бастакытын култуура бүтүн нация сыаннаһын быһыытынан билинилиннэ.

Үсүһүнэн, судаарыстыба үлэ дьонун ытыктыырын туһунан өйдөбүл киирдэ. Онон үлэһит киһи хамнас алын төлөбүрүттэн кырата суох хамнастаах буолара мэктиэлэнэр. Маныаха Саха сирин хотугу кэписийиэннэрэ уонна эбии төлөбүрдэрэ барыта учуоттаналлар. Бу бүтүннүү Төрүт сокуоҥҥа киирэн суруллуоҕа.

Биллэн турар, саҥа көннөрүүлэр киирбиттэрин кэннэ өрөспүүбүлүкэ бары сокуоннарыгар тустаах көннөрүүлэри уонна уларытыылары киллэрэр улахан үлэ күүтэр. Ол гынан баран, бу барыта дойду уонна норуот кэскиллээх буоларын туһугар оҥоһуллар, – диэн Феодосия Васильевна бэлиэтээтэ.

Ил Түмэн пресс-сулууспатын матырыйаалынан.