Саха Өрөспүүбүлүкэтин тырааныспарга уонна суол хаһаайыстыбатыгар миниистирин бастакы солбуйааччы Сергей Владимиров “Саха Өрөспүүбүлүкэтин суолларын уонна суол үлэтин туһунан” өрөспүүбүлүкэтээҕи сокуоҥҥа уларытыылары киллэрэр сокуон барылын кытта билиһиннэрдэ.
Сокуон барылын быһаарыы суругар докумуон 39-с №-дээх федеральнай сокуон бастакы уонна төрдүс ыстатыйаларыгар олоҕуран оҥоһуллубутун туһунан этиллэр. Саҥа көннөрүүлэр ыарахан ыйааһыннаах уонна кутталлаах таһаҕастаах тырааныспар суолунан айанныырыгар сыһыаннаахтар. Ону сэргэ Уһук Хоту оройуоннарга төлөбүрдээх суоллары оҥоруу кэмигэр булгуччу тумнар суоллар оҥоһууларын ирдиир балаһыанньаны көтүрэр. Итиэннэ чэпчэки ыйааһыннаах тырааныспар атын суол-иис суох буоллаҕына, төлөбүрдээх суолунан босхо айанныыр быраабын хааччыйар.
Сис кэмитиэт чилиэттэрэ сокуон барылын дьүүллэһэн баран, кэлэр пленарнай мунньахха бастакы ааҕыыга киллэрэргэ диэн быһаарыныы ылыннылар.
Салгыы “Саха Өрөспүүбүлүкэтин суолун пуондата” диэн сокуон барыла көрүлүннэ. Манна сүрүн иһитиннэриини Сергей Владимиров оҥордо. Көннөрүүлэр бүддьүөт үбүн эрэгийиэннээҕи уопсай суоллар өрөмүөннэригэр уонна ускуустубаннай тутууларга туттуллаллары көҥүллүүллэр. Бу сокуон барыла ылылыннаҕына, Өлүөнэ муостатын тутуутугар суол пуондатын үбэ-харчыта туттуллар кыахтанар. Сис кэмитиэт бэрэссэдээтэлэ Игорь Григорьев Өлүөнэ муостатын тутуутугар пуондаттан төһө үп-харчы барара былааннаммытын ыйытта. Маныаха миниистир солбуйааччыта 2021 сылга 1 млрд солк, 2022 сылга 1,5 млрд солк. көрүллүөхтээхтэрин эттэ.
Куоластааһын түмүгүнэн, сокуон барылын пленарнай мунньахха киллэрэр туһунан быһаарыныы ылыннылар.
Биисинэс-омбудсмен Альбина Кычкина урбаанньыктар бырааптарын боломуочуйалааҕын 2020 сыллаах үлэтин кытта билиһиннэрдэ. Дакылаат түмүгүнэн, норуот дьокутааттара отчуоту пленарнай мунньахха киллэрэр туһунан куоластаатылар.
Ил Түмэн пресс-сулууспатын матырыйаалынан.
-
0
-
0
-
0
-
0
-
0
-
0
